慢嘆生活～葵芳文青悠閒咖啡店～仲有得買特色文具！

葵廣出名熱鬧，行街購物掃街食食野樣樣齊。唔想企係度食野同人迫，想坐得舒服D！？小編今次就搵到附近嘅一間文青咖啡店～望住人來人往嘅繁忙香港人，和友人嘆番杯椰子絲coffee，真係覺得好悠閒啊～

餐廳分室外室內，怕熱嘅朋友，夏天可以選擇到室內坐坐，嘆冷氣！而店內所有枱同椅都係用木造嘅，仲有書本俾人閱讀，充滿住文藝嘅氣息啊！平日下午茶嘅時間客人比較少，小編悠悠坐低，叫咗幾樣又靚、又好味、又精緻嘅美食！
Photo from Presslogic

1)． All day breakfast （A+B+C+D=$118 ）
TOOLSS 嘅All Day breakfast 全部都係自己搭配～份量都唔算細，兩個人share就岩岩好！嗌呢個餐仲可以點任何飲品減＄15，幾方便。小編幾鍾意呢個模式，因為可以比客人多啲選擇～
Photo from Presslogic

而成個拼搭，小編認為鮮南瓜蓉係比較突出嘅選擇，南瓜味好出，甜甜地好好味！大家值得一試～而煙三文魚同香烤煙肉都捲得好優雅～小編見到都唔捨得食！喜歡食菜嘅朋友，都可以揀沙律，一樣健康美味！
Photo from Presslogic

2)．鹽燒鯖魚青醬忌廉飯 （$98)
呢個係小店嘅招牌之一，小編大推！外表已經夠晒吸引～賣相一流！特別係青醬，d汁鋪滿成個飯面，撈飯一齊食有少少香草味又有少少椰香～幾特別！
Photo from Presslogic

而主角鯖魚燒得好香，外皮酥脆～又係相機食先！而且鯖魚係盬花嘅調味之下，完美地將魚味帶出，肉質亦都好嫩滑好香～！好味啊～
Photo from Presslogic

3)．芝士德國熱狗（$58)
鍾意食hotdog嘅朋友，一定唔好錯過呢個芝士德國熱狗。熱狗上面鋪滿煎得又香又脆嘅煙肉碎碎，一咬落去，加埋芥末醬同芝士，又係昇華到另一個層次～口感好豐富！！！
Photo from Presslogic

由成個層次同口感，再加上精緻嘅外觀～絕對可以睇得出係好有誠意嘅製作！不過，熱狗就有少少辣味～如果你係好似小編咁喜歡食辣嘅朋友，咁你一定會好鍾意呢個芝士德國熱狗。但怕辣嘅你，都可以叫杯peach smoothie或咖啡，解解辣。
Photo from Presslogic

4)．peach smoothie （$55)
餐廳仲有一系列嘅水蜜桃期間限定飲野～身為水蜜桃控嘅小編～二話不說揀咗個peach smoothie ！一飲落去，覺得好fresh好夏天～水蜜桃味好重，好似用咗成個水蜜桃整成smoothie咁～又俾人一種好清新嘅感覺～小編大愛啊！大家記得把握夏天嘅機會，嚟呢度試試！
Photo from Presslogic

5)．椰子朱古力 （$40）
唔想凍冰冰飲smoothie ，都有另一個選擇！嚟toolss 最緊要係試下佢嘅咖啡！餐廳咖啡選擇甚多，而店家就為小編精心準備咗椰子朱古力咖啡～（係出面好少見架！）椰絲沿杯嘅邊邊鋪滿，帶俾小編一種好chrismas 嘅感覺～幻想下係冬天飲一杯椰子朱古力咖啡，真係俾人一種好溫暖嘅感覺！而toolss都好鼓吹悠閒嘅生活態度～嚟呢度，唔係唔飲杯野嘆杯咖啡啊！？
Photo from Presslogic

一場嚟到，都可以買D特色文具番屋企～小編都揀幾件先～
Photo from Presslogic

而且，最唔可以錯過嘅係，就係Toolss嘅門口，足以令每個食客打足半日卡～木系嘅裝潢設計風格，俾人一種好舒服嘅感覺～快D約朋友一齊嚟chill一chill啦～
Photo from Presslogic

TOOLSS
地址： 葵芳美芳街2-14號昌鴻大廈地下5號舖
電話號碼: 37099101
營業時間：星期一至日11:00-22:00

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載