農夫歌曲大推介！經曲說唱組合～細數農夫15週年！

咩話？農夫已經成立左15週年架啦？
無錯！雖然農夫係呢幾年加入電視台後形象先比較入屋，但佢地其實係2000年已經組成左啦～
小編覺得農夫令人吸引嘅地方就係佢地真係咩題材都可以Rap出黎～創意無限～～
上兩個星期仲係旺角舉行左6場「農夫等錢洗世界巡迴演唱會」！
作為農夫嘅粉絲，真係好想佢地繼續做音樂～ 今次就等小編介紹幾首農夫嘅歌曲比大家啦！

《鄭永芝》

小編係由2005年嘅《鄭永芝》呢隻碟開始認識農夫～亦係農夫推出嘅第二隻大碟，當中《十七年華》呢隻歌真係好有意思！
由一單新聞嘅角度寫出社會控訴～不得不讚農夫係鬼才！
另外係《鄭永芝》呢隻碟入面，令一首比較創意嘅就係《BOOM支筆》！《BOOM支筆》究竟係咩？
其實《BOOM支筆》係農夫用好搞笑嘅方式呈現佢地嘅BeatBox，真係令小編一路聽一路笑～
當時仲以為自己唔小心轉左去電台！

音樂大亨

如果你有聽過農夫，就一定有聽過陸永嘅《456wing》啦！同一隻碟C君亦都推出左《ABC君》，
兩個都係寫關於自己成為Rapper嘅心路歷程，好聽得黎又有意思～

風生水起

風生水起呢隻碟相信都冇人未聽過～當年仲令農夫橫掃各大頒獎禮！當中同麥玲玲一曲嘅《風生水起》真係Rap到街知巷聞～
《日出而作》入面句「打卡打卡 記得打卡」都非常洗腦！仲有《八無禁忌》更加數盡所有藝人嘅八卦事～
可以話令農夫提高知名度嘅一隻珍貴大碟！

富甲天下

2008年推出嘅富甲天下嘅同名歌曲《富甲天下》到依家都仲係好洗腦～「落雨不怕 落雪也不怕」～
其中一隻歌《話太普通》搵埋台灣女歌手季欣霈一齊唱，一開頭農夫講普通話真係好好笑！

O'Fama

講到2010年推出嘅O'Fama呢隻碟就一定要聽佢地嘅同名歌曲《O'Fama》！呢隻歌足足差不多15分鐘咁長～
仲搵左好多勁人客串！例如陳冠希、許志安、Eason、曾志偉等等～呢隻歌其實係講緊農夫一直以黎嘅辛酸，聽到小編眼濕濕，真係百聽不厭！
《娛樂圈殺人事件》呢隻歌亦都係農夫大玩諷刺娛樂圈之作，當中金句「係娛樂圈 你死你事」真係聽到小編笑左出黎～

奇蹟 (雙EP)

同年農夫終於推出EP《奇蹟》～C君嘅《偉大航道》又係唱到街知巷聞～歌詞令人感動～有少少類似大哥哥教小朋友道理咁！
另一首小編都好中意嘅就係陸永寫嘅《韓國勁舞權》 當年KPOP開始流行，呢首歌就道出左一個問題：點解大家咁中意聽K-POP？
最後小編想介紹一首冷門之作《光行紀》，呢首歌就連內容都係講緊好偏門嘅神秘學！但係重點係其中一段歌詞
「架我到唔阻你人蜴蜥
架信可唔可生人極積
化進咗住阻化文食即
人蜴蜥 人蜴蜥 人蜴蜥」
睇落係咪好奇怪？因為成段歌詞都係調轉黎唱架！小編真心佩服陸永嘅創意～

篇幅有限，小編好難介紹曬農夫嘅心水歌曲～不過小編真係好想農夫可以繼續出歌，其中佢地嘅全新派台作品，
就講出左佢地其實好需要大家支持，小編好想同農夫講聲加油呀～希望將來仲可以見到佢地開演唱會同出歌～

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載