《MAMA》頒獎港星份量十足 BigBang最愛周潤發

《MAMA》頒獎港星份量十足 BigBang最愛周潤發

Life 本地生活 · HotTalk 熱門話題
By Presslogic on 30 Nov 2017

一到年尾,所有K-Pop粉絲都會好期待韓國音樂盛事《Mnet Asian Music Awards(簡稱MAMA)》。自2012年開始,《MAMA》每年都會嚟香港舉行,而且為咗隆重其事,《MAMA》每年都會邀請極具份量嘅港星擔任表演嘉賓或頒獎嘉賓參與盛事,令成個頒獎禮多咗份親切感,今年係《MAMA》第六年「登陸」香港,大家都好期待佢今年會邀請邊個出席,頒獎禮未開始之前不如重溫一下歷年經典演出!

2012年-張國榮紀念表演

《MAMA》嚟香港嘅第一年,大會特別安排主持人宋仲基一開場就同張國榮隔空對唱,開金口唱出哥哥嘅經典金曲《當年情》,其實哥哥到依家都依然係韓國人心目中嘅偶像,一班韓星之後仲一齊獻唱搖滾版《當年情》,向哥哥致敬,電視畫面上更加別出心裁,寫上哥哥出生年份但去除逝世年份,以表示哥哥喺大家心目中長存,真係好感動呀!

TVN
Photo from TVN

Met
Photo from Met

2013年-舞台王者郭富城

Mnet
Photo from Mnet

郭富城2013年獲邀出席《MAMA》並擔任表演嘉賓,作為香港代表城城都施展渾身解數,大跳熱爆金曲,城城跳得大家都知,不過最令韓星們佩服嘅係佢表演全程零咪嘴,大家都知道唔少偶像為咗舞台效果,通常都會咪嘴,見到城城邊唱邊跳嘅完美演出,大家都拍爛手掌,而當晚佢都獲頒「最佳亞洲藝人」獎,實至名歸~

Mnet
Photo from Mnet

2014年-陳奕迅《浮誇》+劉德華擔任頒獎嘉賓MAMA_andy

2014年都可以話係《MAMA》喺香港舉辦咁多屆之中最經典嘅一年,先有劉德華擔任頒獎嘉賓,佢係四大天王入面韓國人最常掛在嘴邊嘅一個,所以當佢現身頒大獎,現場香港觀眾好激動之餘,出席嘅韓星都好興奮,當劉華Chok一Chok個pose,小編都同大家一樣,係咁尖叫呀!

Mnet
Photo from Mnet

呢年嘅表演嘉賓係陳奕迅,佢特別選擇唱《浮誇》一曲,一般韓國歌手都好重視華麗舞台效果,但Eason嘅表演只有自己一個,一個人企喺一個咁大嘅舞台,唱呢首難度10粒星嘅歌,當時無論係觀眾定韓星,都畀Eason嘅超水準演出震懾,韓媒都高度讚揚Eason係真正嘅歌神!

XTM
Photo from XTM

XTM
Photo from XTM

2015年-蔡依林+周潤發擔任頒獎嘉賓

Mnet
Photo from Mnet

雖然15年冇港星做表演嘉賓但就有台灣天后蔡依演出,獲頒最佳亞洲藝人獎嘅佢不負眾望,帶來國際級演出,不過我相信好多觀眾都同小編一樣,欣賞Jolin高質演出嘅同時,都畀佢身邊嘅舞者吸引住,其實佢哋都係國際級嘅舞者嚟㗎!

Mnet
Photo from Mnet

至於呢年代表香港嘅就係親民到爆嘅周潤發,發哥喺韓國人心中係神級偶像,所以當佢頒大獎畀Big Bang,Big Bang都忍唔住要同發哥係咁selfie,後尾發哥仲跳Psy嘅騎馬舞,掀起全場高潮添~

Mnet
Photo from Mnet

2016年-黎明擔任頒獎嘉賓

Mnet
Photo from Mnet

過往幾年大獎都會交畀香港嘅巨星頒,16年都延續呢個傳統,搵咗「金句王」兼「四大天王」嘅黎明,一開始佢就用韓文自我介紹令大家好興奮,之後佢亦都不負眾望即場拋金句,話D員工顧住睇韓星無心工作,所以佢唔會炒魷魚,亦唔會加人工,不過Leon都係講笑搞氣氛姐。

Mnet
Photo from Mnet

2017年-?
今年《MAMA》將會喺聽晚舉行香港場,歷屆嘉賓都好有份量,所以大家都好期待今年仲有邊位港星可以代表香港出席,小編私心希望張學友現身,咁就齊曬「四大天王」喇。

Text: Holiday editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話
比小編們知~大家可以透過Facebook inbox、或者send e-mail到[email protected],直
接將資料傳比小編~謝謝~)

*本文章的圖片均經其本人或其公司授權,其他媒體不得轉載


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook