芋頭迷台灣必食必買嘅芋頭製品!才發現...錯過太多了~原來芋頭都可以咁樣食㗎!

芋頭迷台灣必食必買嘅芋頭製品!才發現...錯過太多了~原來芋頭都可以咁樣食㗎!

Taiwan 台灣必到
By Presslogic on 26 Jan 2018

有無人同小編一樣咁愛芋頭~無論係佢嘅香氣定係口感,簡直世界級!等小編介紹下去到台灣一定要試嘅芋頭產品喇!

1.紫晶酥
鍾意食芋頭嘅朋友一定唔會無試過囉!喺台灣機場一定有得買。通常都有兩款包裝嘅,一個就係咁。

躉泰
Photo from 躉泰

一個係咁。

躉泰
Photo from 躉泰

其實兩款都係黎自躉泰食品㗎,只係一款係9件裝,另一款係12件裝。紫晶酥其實係一塊塊一層層搭上去嘅芋頭酥皮做外層,入面就係超綿密卡芋頭泥,精髓在於最內層嘅嗰粒麻糬,口感層次真係差好遠。小編覺得比起無麻糬嘅芋頭酥,無咁單調同膩。而且芋頭係用世界級嘅大甲芋頭,而麻糬就用咗濁水溪糯米整成嘅。唔得喇,講起又好想食喇!

躉泰
Photo from 躉泰

2.香帥蛋糕
香帥蛋糕相信都係無人不知嘅,專賣好多唔同款嘅芋頭製品。當中最出名嘅就係芋頭卷心蛋糕喇!係勁爆受藝人明星歡迎㗎!16cm長嘅卷蛋,最正係入面嘅芋頭泥,勁多唔係講笑,即係好難得會見到個餡係同層蛋糕一樣甚至係再厚啲。

香帥蛋糕
Photo from 香帥蛋糕

依家仲要有款改版嘅爆漿度激增!問你死未?

香帥蛋糕
Photo from 香帥蛋糕

芋頭系列仲有雙層芋泥蛋糕

香帥蛋糕
Photo from 香帥蛋糕

手作芋泥戚風蛋糕都好正㗎,超滑身嘅蛋糕,中心有綿密嘅芋頭泥,芋頭迷生日收到一定好開心!

香帥蛋糕
Photo from 香帥蛋糕

除咗蛋糕,都仲有手工芋圓賣,返到香港如果掛住台灣味,就可以整黎食喇!

3.連珍餅店芋泥球

連珍
Photo from 連珍

連珍相對香帥可能無咁出名,不過其實喺台灣好多人排曬長龍㗎喇!連人氣節目《食尚玩家》同《康熙來了》都有介紹過。雖然都有出少少其他口味嘅高點,不過最出名就係鼎鼎大名嘅芋!頭!球!將芋頭泥整到好似一球球芋頭雪糕咁。食過嘅人都話好香好綿。通常芋頭泥都係配菜,就咁食芋頭泥比較少有,而到底佢地有咩本事,就咁拎舊芋頭泥出黎賣呢?

YouTube
Photo from YouTube

無咗其他食材嘅味道搭配,芋頭本身一定要夠靚,如果唔係就好易食得出㗎喇!佢地就用咗堪稱五星級嘅大甲芋頭,重點點樣做到咁綿咁滑呢?原來佢地去咗皮之後,會再將外層比較澀同鬆嘅部分去除,淨係保留最綿最有芋頭味嘅芋頭心。非常講究嘅仲有蒸芋頭嘅部分,係要有人從旁睇準時機就拎出黎。絕對唔係就咁用計時器㗎!

連珍
Photo from 連珍

而要做到有細細粒芋頭咬口呢,就係用攪拌機慢慢攪爛喇!之後再加埋鮮奶同糖,咁當然佢地係經過調配嘅黃金比例喇!

芋頭球(TWD$50/盒)4粒

4.芋頭蛋餅

2個蛋早餐店
Photo from 2個蛋早餐店

小編超私心推介,去親台灣,每個朝早唔洗諗一定係蛋餅!不過通常啲料都係肉鬆啊~芝士啊~玉米啊~火腿啊~喺板橋嘅呢間「2個蛋早餐店」就有假日限定嘅芋泥口味嘅選擇,例如香芋起司蛋吐司、雙芋夾心蛋餅、香芋起司蛋餅。蛋餅入面有芋泥重要有融化嘅芝士...攞命!聽講假日要晨咁早去先得㗎!如果唔係就有排你等啊!

2個蛋早餐店
Photo from 2個蛋早餐店

5.阿聰師
黎自台中嘅阿蔥師有台灣芋頭酥之父嘅稱號,大部分產品同得獎作品都係芋頭製品,連品牌嘅顏色都係紫色。一樣佢地都有出芋頭酥同芋頭Q(紫晶酥啲fd),不過小編想特別介紹嘅就係呢個榮獲「2016年度創意糕餅幸福點心大獎」嘅阿聰師的小芋仔。先睇外型已經勁得意,成個芋頭咁!

阿聰師
Photo from 阿聰師

呢個芋頭仔其實同紫晶酥有異曲同工之妙,都係多層次嘅口感,超香嘅酥皮,再黎芋頭泥嘅綿密、麻糬QQ,重點黎喇!奶皇同蛋黃嘅交融,omg!名副其實嘅睇得又食得!

阿聰師
Photo from 阿聰師

芋頭酥佢地有三款選擇。有普通原味芋頭酥、麻糬芋頭酥同蛋黃芋頭酥嘅~

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)
*本文章的圖片均經其本人或其公司授權,其他媒體不得轉載


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook