2月必看！小評大熱電影《忘形水》～ 重口味中嘅唯美浪漫！

荷李活電影《忘形水》除咗喺威尼斯影展奪得最佳影片，仲喺奧斯卡獲13項提名，認真厲害！屢獲殊榮，當然唔止睇人獸相戀咁簡單，《忘》無論喺劇本鋪排、美術上都見其高水準。今日小編都想同大家分享吓～
Photo from 二十世紀福斯影片

《忘》故事發生喺冷戰時期嘅美國，啞巴女生Elisa（Sally Hawkins飾）喺一間研究所做清潔女工，過著寂寞單調嘅生活。一日，Elisa係研究所發現被關係水箱嘅水怪，兩人相知相識，萌生愛意。及後軍方同保安打算將水怪解剖，Elisa拼命拯救愛郎，奇幻情緣如此展開⋯⋯
Photo from 二十世紀福斯影片

電影以「水」象徵愛，巧妙地貫串劇本。Elisa年幼時係水中被救出，水對於佢有重新嘅意義，故對生於河流嘅水怪一見如故。而水都係兩人釋放愛慾嘅地方，有幕Elisa同埋水怪於放滿水嘅浴室纏綿，搞到樓下水浸，幽默地表現出二人熾熱嘅愛！
Photo from The Shape of Water 官方預告

片中又以水嘅藍綠色為主調。Elisa穿著嘅衣物多為藍藍灰灰，直至與水怪相戀後，開始有鮮紅衣飾，與周遭灰灰藍藍嘅世界成對比。亦有細緻位如保安嘅名車、浴室同研究所嘅場景，都運用咗唔同層次嘅藍色配搭，觀眾可細心留意。
Photo from 二十世紀福斯影片

人獸之戀，要喺「重口味」同唯美上取得平衡，導演喺設計水怪呢個角色落咗唔少功夫。水怪帶著原始獸性，會偷食Elisa鄰居嘅貓、失控咬甩研究所保安嘅手指。但同Elisa朝暮相處後，水怪漸變得人性化，學識用手語表達自我。
Photo from 二十世紀福斯影片

造型方面，水怪有其獨特美態，可愛不可厭。被Elisa撫摸後，皮膚泛出閃閃藍光，亦被激發復元傷口嘅超能力，片尾更為Elisa療癒槍傷。水怪其實同人一樣，會為愛人改掉不足、變得強大，愛情真締莫過於此。

除咗男女主角嘅愛情主線，《忘形水》嘅支線也值得留意。有份拯救水怪嘅角色反映當時美國社會低下層： 男同性戀畫家、黑人清潔女工，都係寂莫無助嘅小眾。 數名小人物為成就呢場世人所不容嘅戀愛，與軍方角力，同時為自己反抗社會權勢。小人物都可以成為英雄，相當有意思。
Photo from 二十世紀福斯影片

Photo from 二十世紀福斯影片

小編覺得好感人～快D約埋男朋友一齊去睇啦！！！
Photo from The Shape of Water 官方預告

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載