上一季嘅韓劇有幾套特別好口碑，講監獄故事原來都可以咁搞笑

農曆新年放咁多日假，又係煲劇嘅好時間，小編嚴選咗幾部值得關注嘅韓劇，愛情、查案同犯罪都有，一次過煲曬啱啱好放完假～

《花遊記》（播放中）
主演：李昇基、吳漣序、車勝元、李洪基
集數：預計20集

Photo from tvN

《花遊記》雖然未播完，但因為呢套劇人氣太高，依家都播咗一大半，依家開始睇都差唔多。劇集以《西遊記》為藍本，都係講唐三藏要拯救世界，套劇裡面出現嘅大部分角色都係西遊記嘅角色，所以大家會好有親切感，但不同之處，就係唐三藏變成女人，金剛箍唔再帶喺頭上，佢仲係愛情嘅枷鎖，所以三藏同孫悟空係會發展愛情故事！

Photo from tvN

另一主角係飾演牛魔王嘅車勝元，佢喺裏面做一個情深款款嘅妖怪，為咗拯救心愛嘅仙女不斷努力幫手捉怪（其實都係搵三藏搞），希望自己成仙之後可以控制人間生死，繼而拯救變成凡人不斷受難嘅仙女。車大叔大部分時間都喺度搞笑，不過都有唔少深情情節，越睇越心痛！

Photo from tvN

Photo from tvN

最近呢幾集「殭屍」仲非常搶鏡，被「阿斯女」俯身嘅佢更加介入孫悟空同三藏之間嘅感情，個個都喺佢掌控之中，點算好？

Photo from tvN

呢套劇咁受歡迎，因為其他角色嘅故事都一樣好精彩同吸引，而且頭幾集仲有好多星客串，加埋華麗嘅特技。不過一個係人一個係妖怪，兩個人真係可以一齊？？

Photo from tvN

《機智的監獄生活》
主演：朴海秀、鄭敬淏、丁海寅、成東鎰、鄭秀晶
集數：16

Photo from tvN

故事講述身為超級棒球明星嘅主角金濟赫為咗救險被強姦嘅阿妹而誤傷嗰個人，本來大家都以為佢會以「正當防衛」為由無罪釋放，點知對方最後腦死，而男主角就因為咁被判一年，呢套劇就係講佢嘅監獄生活。開頭小編都以為會好似《Prison Break》咁，完全唔係！佢其實60%都係搞笑嘅監獄生活故事，男主角係一個生活白痴，個樣呆呆地仲成日做白痴嘢，好似佢聽到暗戀嘅女仔拍拖，拎電話變咗拎餐廳嘅提餐通知機！

Photo from tvN

除咗佢之外，其他角色都一樣好搞笑，好似同佢同倉嘅囚犯外表好似好凶神惡煞咁，但其實佢哋好nice，成日搞出個大頭佛，但又好關照金濟赫，有次有個精通法律嘅囚犯代表佢哋申請要食雞件而唔係雞頸，結果第二日真係全部都係雞，正當大家以為佢真係咁勁，原來係因為前一日疑似禽流感殺曬D雞先有咁多嘢食！

Photo from tvN

Photo from tvN

不過笑還笑，其實故事之間會不斷滲透好多人性醜惡嘅一面，無論係囚犯定監獄長，大家都會為咗個人利益而傷害其他人，對你好嘅都未必係真心，但主角就會本住正直嘅心態去做佢覺得係正義嘅事，幫其他囚犯解決困難。

Photo from tvN

《鋌而走險》
主演：延宇振、朴恩斌
集數：32

Photo from SBS

雖然兩位主角都唔係香港人熟識嘅大明星，但呢套劇故事寫得好好～以律師為主題嘅電視劇有好多，不過以法官為主嘅就比較少。劇集講述女主角細個因為哥哥被判入獄而決心要做一個法官，唔想有人因為誤判而浪費一生。當佢正式做法官嘅時候成日搞亂檔，搞到上司都睇佢唔順眼，而男主角就係模範法官，做嘢爽快判決明確，但佢性格孤僻所以冇乜朋友。兩位法官各自審判唔同嘅案件，但喺審判嘅過程中，佢哋發現幾單官司互相有關連，而女主角仲發現哥哥係含冤入獄！

Photo from SBS

劇集中段開始講男女主角點樣一層一層咁揭開故事嘅真相，哥哥含冤入獄最後被人殺害令佢哋一下子失去方向，女主角更加一度懷疑哥哥單強姦殺人案嘅真兇，係一直喺自己身邊好照顧自己嘅前輩，後來佢再查，發現前輩一家係故事嘅核心人物，前輩好鍾意自己、前輩媽媽係引導自己成為法官兼處理哥哥案件嘅前法官、前輩爸爸係總統候選人，每一個人都唔似有殺人嫌疑但兇手肯定喺裡面，究竟邊個先係真兇呢？

Photo from SBS

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載