屋企人奪命追魂call，其實都係想你飲啖湯見吓對方姐～

By 123testing on 15 May 2018

喺香港，每日都有超過3,300噸食物被棄置，响呢個講求環保同可持續發展嘅社會，食物回收成為一項好重要嘅全民運動。相信大家都有聽過惜食堂，佢哋嘅宗旨係停止浪費、解決飢餓、以愛相連，仲一直推行食物回收及援助計劃。惜食堂依家每個星期會有五日响領展旗下30個街市收集剩餘食材，跟住就將剩餘食材「升級」再製作成餐盒，派發俾有需要嘅市民；不單止可以減低食材嘅浪費，更加令回收嘅食物重新融入生活中，令市民受惠於剩食回收計劃。由2016年開始，領展已透過「愛・匯聚計劃」資助約300萬港元俾惜食堂推行呢個計劃！

Photo from 惜食堂facebook

相信好多人都好熱衷幫助其他人，亦都好響應環保，其實大家都可以出多一分力，仲有靚湯水飲添～～領展最近特別舉辦咗一個叫「盛湯廚房」嘅慈善活動，秉承惜食理念，以回收食物製作湯水，搵嚟國際名廚王凱傑(Jason)幫手，善用領展街市商戶回收嘅食物同埋其他新鮮食材，設計咗四款獨門靚湯作慈善義賣，為惜食堂籌款。Jason烹製嘅湯水連「地獄廚神」Gordon Ramsay盛讚無可挑剔，今次「盛湯廚房」每款湯水都有唔同功效，又有特色，仲宣揚將環保融入生活嘅意念，點都一定要去飲返碗同做埋善事～

「盛湯廚房」喺母親節前夕已經正式啟動，所以呢4款靚湯都特別向平日勞苦功高嘅媽媽致敬，好似有由Jason享負盛名嘅「蛤蠣湯」變奏而成嘅「神級Fusion湯」，以養胃生津嘅黃芽白、利水消腫嘅葫蘆瓜同補腦嘅冬菇熬製，可以令精明嘅媽媽頭腦更清晰；用營養豐富嘅菠菜同豆腐熬製、幫媽咪清熱除煩、調理下氣嘅「下火蛋花湯」；用南瓜、木瓜、紅蘿蔔熬製，具抗氧化功效、令媽咪keep住靚靚嘅「仙氣養顏湯」；仲有用番茄、青瓜同埋紅甜椒熬製嘅全素版「佛系番茄湯」，幫媽媽增強免疫力～

Jason設計咗呢幾款咁有心思嘅靚湯，其實都係希望大家「藉着靚湯說愛你」，慰勞媽媽，一家人齊齊整整飲啖湯見吓對方，增進感情，同時略盡綿力幫助其他有需要嘅人～「盛湯廚房」活動現場有個捐款箱，只要捐出港幣$10或以上，就會得到一張「盛湯廚房」換領券，咁就可以換一碗靚湯，大家仲可以根據個人喜好揀芫荽、炸蒜、南瓜籽、黑胡椒、櫻花蝦乾、有色爆谷、ABC字母餅同埋心型及星型麵包多士等等多款配料，而募捐所得嘅款項將會全數撥捐惜食堂，支持食物援助計劃，有滋補湯水飲、可以孝敬媽媽，仲可以輕輕鬆鬆做善事，何樂而不為呢？