洗碗原來有心理療癒功效，連億萬富豪蓋茨都係靠呢招減壓！

細個聽到阿媽叫自己去幫手洗碗，一定會連番推搪，覺得洗碗好麻煩、好浪費時間。不過有潔癖嘅朋友就唔係咁諗，仲好享受洗碗嘅過程，有時候見到阿媽洗完碗仲會好開心，原來洗碗真係唔止洗碗咁簡單㗎！

美國佛羅里達州立大學之前曾經針對洗碗做咗一項研究，先將參與研究嘅學生分為兩組，一組先閱讀洗碗步驟嘅文章，另一組就閱讀如何用心洗碗嘅文章。結果前者好求其咁洗碗，壓力荷爾蒙其實無太大改變，反而後者真係付出真心去洗碗，最後佢哋嘅壓力荷爾蒙濃度有明顯嘅下降，甚至乎降咗27%！

Photo from shutterstock

點解認認真真用心去洗碗可以減壓呢？日本自律神經專家小林弘幸就話主要有3個原因：

Photo from shutterstock

1.洗碗嗰陣會接觸到流水
洗碗嗰陣雙手接觸到流水，會「啟動」負責放鬆嘅副交感神經，加上流水聲會令大腦產生一種以為自己身在大自然嘅錯覺，自律神經起伏會放慢D同有規律D，情緒自然就會鎮定好多～

Photo from shutterstock

2.動作easy+steady
跳舞嗰陣跟住拍子跳你個人都high D，洗碗都係一樣㗎～好似洗碗呢D簡單嘅家務，有一定嘅簡單規律，開水-加洗潔精-洗擦-過水-抹乾,keep住個規律去做，腦部處理壓力刺激嘅杏仁核都會跟住滿滿放鬆，令內分泌系統穩定，壓力荷爾蒙濃度自然都會降低。

Photo from shutterstock

3.成就感
小編以前都唔覺，習慣咗洗碗呢個職務之後，每次見到D碗污糟變到「立立令」都會好開心，覺得之前努力擦嘅功夫無白費到。每日呢D微細嘅成就感累積起上黎，就會激發到快樂嘅情緒，加上勞動嘅時候可以忘記心中牽掛，一身鬆曬！

Photo from shutterstock

美國《Mindfulness》學術期刊亦都有提及過洗碗減壓嘅事，指出認真洗碗嗰陣，人會好專注喺洗潔精泡泡嘅味道同碗嘅手感，加上適當嘅水溫等等，可以將負面情緒轉化做正能量，少D負面情緒同雜念就會少D焦慮同壓力，可以改善睡眠品質同講低患憂鬱症嘅風險，連億萬富豪蓋茨都曾經透露過自己成日會幫手洗碗，仲話洗完碗好開心～唔怪得D劇集女主角一唔開心就係咁洗碗洗嘢啦～～～

資料來源：《Mindfulness》、佛羅里達州立大學研究

Photo from shutterstock

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載