九巴特意向市民解釋關愛座使用權！九巴：有需要就可以坐 #大人細路都可以坐！

自從九巴推出「關愛座」後，呢個本為出於好意嘅舉動，結果搞到滿城風雨，後生仔小朋友唔敢坐，一坐就好似畀成車人歧視咁，仲有部分老人家倚老賣老，出口術迫人讓出關愛座。而且網絡上不時有一啲巴士乘客鬧交片段，好多都只係為咗一個關愛座！正所謂「相嗌唔好口」，九巴最近就喺FB專頁特意向市民解釋關愛座使用權，大家唔好再為張櫈而嘈啦⋯⋯

Photo from FB@KMB九巴專頁

九巴尋日於官方專頁發文並貼圖解釋，關愛座「原意係讓畀有需要人士坐，不論係身體唔舒服、長者、孕婦、抑或殘障人士等等」，而且仲表示，「大家有時候都會有身體唔舒服想休息嘅時候，肉眼睇唔見但唔代表佢冇需要㗎。如果咁啱冇人需要坐，大家其實坐下都冇問題㗎」！

Photo from FB@KMB九巴專頁

而所貼圖中亦有重申關愛座只要「有需要就可以坐」，即係除咗關愛座位圖上嘅孕婦、殘障人士、老人家等，其實只要有需要就可以坐，同一般座位分別不大。加上好多「有需要」嘅情況係肉眼見唔到㗎，例如女士們經期、工作期間站立太耐、學生書包過重、頭暈發燒、腰背痛等等。

Photo from FB@KMB九巴專頁

而九巴喺文中亦有Hashtag「#大人細路有需要都可以坐」，仲搞笑用咗方東昇金句「#世界上最大嘅空間就係進步空間」，所以大家都唔好戴有色眼鏡去睇一啲年輕人或小朋友坐關愛座啦！

Photo from FB@KMB九巴專頁

不過當然如果身體並無不適，又有見有需要人士上車，都不妨大方讓出大家嘅座位，幫助有需要嘅人啦！而大家有需要時得到他人幫忙，都可以禮貌地報以一句「唔該」，咁大家都可以開開心心啦！

圖片來源：FB@KMB九巴專頁

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）