抹茶故鄉 - 「宇治」除左中村藤吉，你又知幾多？宇治必到景點逐個捉～

By 123testing on 10 Oct 2017

講到「宇治」，好多人淨係會諗到抹茶，又或者係中村藤吉本店。但其實除左呢啲，究竟大家又知幾多關於「宇治」嘅野呢？今次一於同大家介紹下人人稱之為「抹茶故鄉」嘅地方究竟有咩係必去嘅景點啦～

講到關西自由行，一定會第一時間諗起大阪、京都、神戶等大城市，但如果你想喺整個旅程中搵一日遠離滿滿嘅遊客同旅遊熱點，宇治絕對係一個好選擇。當你計劃宇治嘅行程，不妨參考下以下嘅景點～

宇治橋及紫式部像
宇治大橋係日本三大古橋之一，而宇治橋係當中最古老嘅，建於646年，而家呢座橋係1996年重建，長約155公尺，寬約25公尺~
宇治橋兩岸各有不同嘅風情，企喺橋上眺望遠方山巒，陽光灑落喺河川上面閃閃發亮，成個畫面好靚～

Photo from Instagram

宇治橋畔仲有個紫式部像，紫式部係日本平安時代嘅一位女性文學家，主要作品有長篇小說《源氏物語》；作品描寫嘅人物心理好細膩，被認為係世界最早嘅長篇小說，所以對往後日本文學嘅影響極大。因為宇治大橋曾經喺《源氏物語》嘅書中被提及過，所以喺呢度會有個紫式部像～

Photo from Instagram

中村藤吉本店/中村藤吉平等院店
中村藤吉本店同埋平等院店同樣被列為宇治嘅「重要文化景觀」。而呢個行程相信大家黎宇治都一定會到～店內外環境清優舒服，品嘗著濃濃帶回甘嘅抹茶食品及飲品，簡直係一大享受！比較多人點嘅包括宇治金時、抹茶蕨餅、抹茶涼麵、抹茶刨冰等。身為抹茶控嘅朋友點可以唔黎朝下聖先！

Photo from Tabelog

宇治神社及宇治上神社
由橘島走過朝霧橋就會到宇治神社嘅入口，沿著路往上行首先會到達宇治神社。通過第一個紅色鳥居後係宇治神社，呢度以前係菟道稚郎子的宮殿遺址，稱作離宮明神或離宮八幡，直到明治維新以前名稱還一直保留為離宮下社。宇治神社唔算大，朱紅色嘅主殿係鐮倉初期嘅建築物，內殿供奉著菟道稚郎子嘅木製等身大坐像。

Photo from Instagram

再朝著山上方向走，就會到達宇治上神社。宇治上神社係平安時代後期所建，同時亦係現存最古老嘅神社建築，屬於世界文化遺產之一，主殿依舊保留著原汁原味嘅木造建築。進入神社首先會見到右邊嘅受理台，除左可以買到一般神社有售嘅御守同許願牌之外，仲會睇到好有趣嘅朱印介紹。

Photo from Instagram

平等院鳳凰堂
平等院裡頭最重要嘅建築就非鳳凰堂莫屬！鳳凰堂啱啱經歷過整修，整修過後鳳凰堂紅噹噹嘅外牆色好華麗貴氣，配埋藍天及阿字池的水面倒影，實在係太靚喇!鳳凰堂之所以為名係因為建築屋頂上有一對象徵尊貴嘅金銅鳳凰像，原本為金銅綠色，在整修後變成金黃色，顯得更加高貴～

Photo from Instagram

Starbucks平等院店
位於平等院表參道嘅呢間Starbucks，係宇治嘅第一家分店。店鋪為左可以同宇治街景融為一體，使用左人字型屋頂。屋簷下以走廊為構想，並設置座位。以「與自然融為一體的場所」為中心理念，描繪出喝茶時可以放鬆心情嘅樣子，令客人可以融入和式文化嘅空間內享用咖啡。另外，庭院同建築物連接一齊，大家可以一邊飲咖啡，一邊盡情享受景色。店內主要使用落地窗，加上凳同枱設定成可以輕鬆眺望到庭院嘅高度，令顧客能充分地享受到風景。