千嬅相隔17年再幫TVB拍劇，今次佢會黃浩然合作，大家都好期待「劍雄」同「方麗娟」重聚！

新劇《多功能老婆》由楊千嬅、周柏豪、黃錦燊、黃浩然、陳煒同埋洪永城領銜主演，對於新劇大家都有兩個好期待嘅位：1.千嬅事隔多年再拍劇 2.黃浩然！黃浩然！黃浩然！

Photo from 黃浩然weibo

雖然男主角係柏豪，但當年《新紮師妹》嘅影響力真係好強大，大家難以忘懷黃浩然嘅「劍雄」同千嬅嘅「方麗娟」，今次浩然喺新劇仲真係叫「劍雄」，如果千嬅都叫「麗娟」就好啦。

Photo from 黃浩然weibo

喺未有得睇新劇之前，大家仲記唔記得千嬅之前拍過嘅劇集呢？原來千嬅都可以話係福星，有佢嘅劇集都係大旺收場～

千嬅喺97年接拍第一部無TVB劇-《隱形怪傑》，當時大結局收視去到30點。故事係講做記者嘅林家棟同阿妹千嬅仲有爸爸媽媽生活得好平淡但快樂，因為一宗鑽石失竊案，令家棟惹上麻煩，之後仲畀死對都陳啟泰陷害，家棟誤打誤撞飲咗隱形藥水變成隱形人，跟住四出查案為自己平反！呢套劇開頭因為題材太新穎，觀眾唔太受落，但之後大家越睇越過癮，收視回升！

《外父唔怕做》係千嬅首次擔正第一女主角嘅劇集，小編到依家都記得首主題曲呀～～

呢套劇佢同張家輝同埋秦沛合作，平均收視都有30點～秦沛做千嬅嘅爸爸，因為見到阿妹婚姻失敗，所以更加緊張個女嘅人生大事，而做千嬅男朋友嘅家輝就要慢慢打破雙方隔膜。

不過秦沛飾演嘅爸爸係個緊張大師，要喺對方嘅祝福下結婚真係唔容易，套劇令好多父母都有共鳴，最正嘅係秦沛隔多N咁多年，再次喺電影《春嬌救志明》度做千嬅爸爸，D回憶返曬黎呀～

隔咗3年之後，已經成為收視保證嘅千嬅接拍《美味情緣》，拿～唔好搞錯係《美味天王》呀（雖然嗰套千嬅都有參演）。

呢次佢拍住林峯，仲有陳慧珊同吳啟華，亦都係佢喺TVB入面最後一套劇～故事講述陳慧珊同細佬林峯素未謀面，但有日佢突然收到律師信話要繼承生父喺南丫島嘅海鮮酒家，跟住就同細佬一齊去經營，期間佢搵黎曾經係名廚嘅吳啟華幫手重振海鮮酒家，而千嬅就喺劇裡面飾演酒家嘅侍應，但其實佢係有錢女，佢仲同林峯做咗一pair，佢哋兩個鬥嘴嘅情節真係好可愛、好搞笑呀～～

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載