《比得兔》動畫交織真人演出！輕鬆道出人生哲理！

「比得兔」（Peter Rabbit）呢個名相信大家唔會陌生，源自英國童話《比得兔的故事》（The Tale Of Peter Rabbit），講述「百厭」兔仔比得潛入鄰居麥先生菜園偷食，差啲被對方捉走嘅老掉牙故事。然而，兒時經典搬上大銀幕，又帶來另一份驚喜！

Photo from Peter Rabbit Movie

電影《比得兔》以童話原著為藍本，加入多個人類角色及感情線。比得兔（森美 聲演）同兄弟賓仔（陳豪 聲演）一家原本同其他動物居住菜園，豈料孤僻古怪嘅新屋主麥奎格先生入伙後，竟將所有動物趕走。同時，美女畫家碧雅對比得兔關愛有嘉，但討厭兔仔嘅麥先生為討芳心，邊扮好人邊同比得兔鬥到你死我活！

Photo from Peter Rabbit Movie

Photo from Peter Rabbit Movie

動畫與真人配合自然
動畫配真人演出嘅電影常見，但《比得兔》結合2D、3D動畫加真人演員則為之出色。立體版嘅比得兔表情、動作都非常生鬼，加上森美搞笑聲演，更突出其「百厭」個性。 而3D角色同真實演員、場景配合自然，如其中一場戲麥先生同比得兔大戰菜園，比得兔擲蕃茄彈走對方炸藥，搞笑得嚟又富張力！

Photo from Peter Rabbit Movie

電影亦有運用平面畫作，向原著致敬。《比得兔》原著繪圖常隱藏喺女畫家碧雅作品中，也用於投射比得對亡父嘅思憶。有幕比得兔對著爸爸肖像懺悔，兔爸爸突然「顯靈」教佢與麥先生化敵為友，成劇情轉捩點。導演利用兩種動畫呈現比得內心世界，相當有心思。

Photo from Peter Rabbit Movie

Photo from Peter Rabbit Movie

角色刻劃立體人性化
小編覺得《比得兔》值得一讚嘅係劇本深化原著角色性格，每隻小動物都非常人性化。電影中比得兔總跟麥先生對著幹，並非純粹因為頑皮，而係為捍衛佢心中嘅「家」。 菜園象徵家園，麥先生先驅趕園內原居動物，後追求被比得視為母親嘅碧雅，故即使比得一家已安居園外，仍常同賓仔冒著性命危險去挑釁對方。

Photo from Peter Rabbit Movie

Photo from Peter Rabbit Movie

來自大城市嘅麥先生，並非典型大反派，只係一個執著名利嘅孤僻男。佢被大公司解僱後，深深不忿獨遷鄉郊，為家中菜園釘上欄柵，將自己與他人、大自然隔離，只顧著計劃喺職場捲土重來，直至遇上多番「破門而入」嘅比得同溫柔嘅碧雅，從而反思人生有更多事物值得追求。

Photo from Peter Rabbit Movie

Photo from Peter Rabbit Movie

小故事大哲理：學會愛與分享
連場搞笑人兔大戰，輕輕鬆鬆最後嚟個Happy Ending，比得與人類最終放下成見，共居菜園成為真正「一家人」。說穿了，其實《比得兔》係一個成長故事，比得兔同麥先生從矛盾中學會愛：愛需要分享，而非獨自佔有。比得兔最後明白接納麥先生才會令「母親」碧雅幸福，跑到城市請求對方回來，卒之感動麥先生放棄高薪厚職，回鄉移走欄柵，跟小動物分享菜園，從此比得同麥先生嘅「家」都比以前更廣闊。人有時要放低執著，分享愈多，才得到愈多。 

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載

Holiday長期歡迎大家投稿～我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物～投稿可以傳送到 holiday@presslogic.com比小編檢查一下先，記住要附上100字內自我簡介。 另外文章一經採用，編輯將會進行潤飾。期待你哋既大作啊！
Follow Instagram: holiday.presslogic