研究：人愈「大頭蝦」愈聰明！忘記係為咗記重要事！執行大事更出色！

你係咪成日唔記得帶銀包、鎖匙、電話？又或者成日唔記得頭先做過咩，總之總係俾人話你「大頭蝦」？如果係嘅話，唔係你懵，而係你太醒！多倫多大學有研究指出，原來健忘嘅人比一般人更聰明！

Photo from shutterstock

人之所以會善忘，係基於我哋嘅大腦有刪除記憶嘅機制，大腦中嘅海馬體（Hippocampus）長出愈多神經細胞，愈多記憶就會被刪除。

Photo from shutterstock

而研究指出，「大頭蝦」嘅人懂得聰明地利用大腦「優化」地儲存記憶，選擇去忘記生活上唔重要嘅細節，騰出記憶空間去記一般人難以記得嘅事物，或需要使用更大腦容量嘅工作。

因此，「大頭蝦」雖然唔擅長記住瑣碎事，但就更有能力面對複雜工作、決策大事，故較一般人聰明。

Photo from shutterstock

負責研究嘅Blake Richards教授認為，「大頭蝦」嘅人更識得運用大腦儲存嘅重要資訊，喺適當時候當機立斷。

換句話講，即係比起一般人嘅大腦少啲無用、混亂嘅信息，所以會喺重要場合、專業領域中更出色，解決突發問題亦更靈活。

Photo from shutterstock

不過留意呢個理論只適用於健康嘅成年人，如果你係因唔夠瞓、壓力過大或腦退化所導致嘅「大頭蝦」，就要正視問題啦！

資料來源：University of Toronto

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載