《小偷家族》真相一層層剝開!血緣真係咁重要?唔係親生就唔可以存有親情?親生父母必然對子女好?

《小偷家族》真相一層層剝開!血緣真係咁重要?唔係親生就唔可以存有親情?親生父母必然對子女好?

Hong Kong 香港食玩 · Life 本地生活 · Movie 電影
By PressLogic on 11 Jul 2018

《小偷家族》一開始睇以為只係講一個以偷嘢為生嘅家庭,無諗過探討嘅家庭問題、社會問題,以及埋下伏線嘅懸疑會咁多,睇完會有種意猶未盡嘅感覺,係一套開首平淡、後勁凌厲嘅電影。

安樂影片
Photo from 安樂影片


《小偷家族》由《海街女孩》導演是枝裕和編導,入圍第71屆康城影展官方競賽單元,贏得金棕櫚獎。

安樂影片
Photo from 安樂影片

講述喺扭曲嘅日本社會生存嘅低下階層家庭,窮爸爸 (Lily Franky飾)除咗做地盤,仲同阿仔以做小偷為生。有晚偷完嘢返屋企時,遇到個女仔天寒地凍畀人趕咗出門 ,好心帶佢返去食,自此就跟住父子、媽媽信代 (安藤櫻飾)、婆婆 (樹木希林 飾)及喺夜店做嘢嘅姨仔 (松岡茉優飾)過活,但愈睇落去就發現每個人都有自己嘅秘密。

安樂影片
Photo from 安樂影片

故事睇落似順敘手法,其實係到後期會慢慢補返各人嘅過去,令觀眾對佢地每個人嘅過去都好奇,點解「一家六口」會聚埋一齊?佢地各自又有咩故事,令到佢地走埋一齊?而呢啲故事都代表住社會唔同嘅問題。

安樂影片
Photo from 安樂影片

安樂影片
Photo from 安樂影片

當佢地聚埋一齊就會覺得佢地生活雖然唔富足,但過得開心。一家6口一齊去沙灘,係最開心嘅時光。

佢地接受個小女孩,當佢係家庭嘅一份子,當佢係囡,明明知道接納佢有機會畀人當做拐帶,但因為覺得個女仔唔走,就係揀咗佢地做親人,所以點都會保護、愛惜佢。

安樂影片
Photo from 安樂影片

安樂影片
Photo from 安樂影片

再慢慢發現原來佢地6個人都無血緣關係,但彼此嘅牽絆比有血緣關係嘅人更加親近。好似婆婆同姨仔亞紀,爸爸同阿仔,媽媽同阿囡,都有令人好溫暖嘅一幕,好似亞紀痴住婆婆,爸爸係咁要阿仔叫出「爸爸」呢個稱呼,阿囡同阿媽沖涼個時,摸住阿媽以前因家暴留下嘅疤痕。

安樂影片
Photo from 安樂影片

安樂影片
Photo from 安樂影片

當中帶出嘅社會問題反思,最主要嘅一定係父母一定愛親生子女嗎?可以粗暴對待,亦可以個囡失蹤,會覺得輕鬆咗,唔想去搵返,甚至當佢只係去留學,當佢無存在過咁。

安樂影片
Photo from 安樂影片

而佢地呢一家偷嘢係咪正確?阿仔一直以來學呢個家嘅爸爸偷嘢,以為係舖頭嘅商品唔屬於任何人,係可以唔駛畀錢咁拎走。

安樂影片
Photo from 安樂影片

安樂影片
Photo from 安樂影片

到個小女孩跟住佢偷嘢,士多老闆暗示佢唔好教阿妹呢啲嘢,仲放過咗佢,令佢明白原來偷嘢係唔啱。到小女孩想再學佢偷嘢,佢用行動證明畀小女孩睇,咁樣係唔正確嘅事,故意畀人捉到,想小女孩引以為誡

安樂影片
Photo from 安樂影片

安樂影片
Photo from 安樂影片

安樂影片
Photo from 安樂影片

婆婆就係一直呃政府得一個人住,到佢無聲無息咁逝世,呢個屋企嘅爸爸媽媽唔係諗點安葬佢,而係想繼續拎到生果金,所以將屍體收喺屋企,再因為阿仔畀人捉咗,佢地之間嘅過去先一層層咁剝開。

安樂影片
Photo from 安樂影片

亞紀喺夜店做裸露身體換取金錢嘅工作,一直以為婆婆係無意間執佢返嚟。原來婆婆係佢親生爺爺嘅前妻,仲用拜前夫為藉口,等佢地畀錢。當婆婆拜訪佢地,觀眾先會發現亞紀用親生妹妹嘅名作為夜店工作嘅藝名,而呢個屋企對外宣稱亞紀只係留學,但又無搵過佢。

安樂影片
Photo from 安樂影片

亞紀最後先發現婆婆留佢係身邊,並非好單純咁善良,更多嘅係知道佢嘅過去,有少少嘅報復心態。

導演兼編劇嘅是枝裕和著墨喺幾個角色之間嘅性格刻劃、社會引發佢地嘅悲劇,但就喺佢地嘅將來「留白」,而角色嘅過去都唔係講得非常清楚,但大家睇到中間會覺得緊張,會想知道晒咁多個角色嘅過去,點解佢地會聚埋一齊,成為家人?

安樂影片
Photo from 安樂影片

呢幾點都令到觀眾好想睇落去知道發生咩事,而故事嘅重心同情節都拿捏得好好。到最後,阿仔同阿爸講最後一次見面,佢上咗巴士╴阿爸追住巴士,而阿仔無聲講出一句說話,到底係「謝謝」定係「爸爸」呢?但都已經令人有心酸到想落淚嘅感覺。

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)

*本文章的圖片均經其本人或其公司授權,其他媒體不得轉載


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook