《維尼與我》負面又腹黑嘅咿唷好搞笑  睇完會好鍾意維尼+森林朋友~重返初心會令你由迷失搵返自己

《維尼與我》負面又腹黑嘅咿唷好搞笑 睇完會好鍾意維尼+森林朋友~重返初心會令你由迷失搵返自己

Hong Kong 香港食玩 · Life 本地生活 · Movie 電影 · HotTalk 熱門話題
By PressLogic on 10 Aug 2018

唔少人睇到《維尼與我》嘅時候,會第一時間聯想到之前3月上映嘅《再見小熊心》,同樣都係講告別童年嘅故事,唔同在於《維尼與我》會多咗份會心微笑、重返初心嘅感覺,少咗份心酸。

《維尼與我》係講述羅賓細個喺百畝森林同維尼、小豬、咿唷、跳跳虎等動物探險,後來被屋企人送到寄宿學校讀書,當時仲成日好掛住維尼,但後來羅賓嘅爸爸逝世,親戚都同佢講:「你而家係一家之主嚟㗎啦。」到當兵經歷過戰役,都令佢明白到要告別童年。

Disney Movie Hong Kong
Photo from Disney Movie Hong Kong

到大個咗,因為工作、因為生活壓力令佢迷失,對自己嘅囡都好嚴格,覺得佢應該要學習,而唔係好似佢咁呢個時候維尼竟然經過百畝森林嘅小門,嚟到倫敦搵佢,要佢幫手搵返百畝森林嘅朋友仔。

Disney Movie Hong Kong
Photo from Disney Movie Hong Kong

如果話《再見小熊心》係講告別童年,咁《維尼與我》就係講點樣重返初心嘅故事。

羅賓
當羅賓由小朋友去到寄宿學校前,佢同維尼講永遠唔會唔記得佢。而維尼一直都將羅賓記著,望住以前羅賓會經過嚟搵佢地嘅小門,但無論晴天定雨天,點等都等唔到嘅背影好令人心酸。

羅賓為咗生活不斷努力奔波,為咗想女兒之後生活舒服啲,會想佢努力學習,連囡囡想佢講嘅床邊故事,佢都會拎起教科書講歷史。佢無意識到囡囡係想同佢拉近距離,就算唔想去寄宿學校,但覺得羅賓會開心先會應承。

Disney Movie Hong Kong
Photo from Disney Movie Hong Kong

當初羅賓話唔會忘記維尼,但事實上佢真係無再諗起維尼,就好似當初嘅初心都忘記埋咁。

為生活奔波嘅佢,好似迷失咗自己咁。佢喺童年總會搵到維尼嘅山頂上面,對維尼講咗句:「我迷失咗。」而維尼雖然思想好似小朋友咁,但佢答羅賓:「但我搵到你。」

Disney Movie Hong Kong
Photo from Disney Movie Hong Kong

維尼就代表住羅賓嘅「初心」,細個嘅羅賓講過:「無所事事,往往帶來最好的事。」但大個咗嘅佢就覺得唔可以無所事事,要為生活努力,同時都要求自己個女要睇有意義嘅書,有空餘時間就學習。

但連佢自己都覺得迷失咗。重遇維尼,開頭佢會覺得麻煩,想快啲送走佢返去,但同維尼呢個仲係充滿童心嘅小熊相處,令佢諗返起好多細個開心嘅過去,發現陪伴家人,同埋「無所事事」係好重要。

Disney Movie Hong Kong
Photo from Disney Movie Hong Kong

維尼
雖然唔少人話覺得真人電影嘅維尼同動畫版嘅外表有出入,但電影嘅維尼講嘅嘢同行為都好得意~

佢因為平時會同人打招呼,嚇親城市嘅人,畀羅賓叫佢玩「扮瞓覺」遊戲;喺火車車廂到大聲玩見到咩就嗌咩嘅遊戲,羅賓叫佢細聲玩,佢就細細聲玩,個時都會覺得佢好可愛!

Disney Movie Hong Kong
Photo from Disney Movie Hong Kong

不過喺佢默默企喺百畝森林小門前面等羅賓,上山頂坐喺以前同童年羅賓鍾意坐嘅位,都會令人有種心酸嘅感覺。

而佢同成年嘅羅賓講返羅賓細個嗰時講過嘅「無所事事,往往帶來最好的事」;羅賓同佢謂講自己迷失咗,維尼同佢講返:「但我搵到你」,都會覺得維尼嘅言行係會令人深思。

Disney Movie Hong Kong
Photo from Disney Movie Hong Kong

咿唷
咿唷係戲入面嘅角色就係成日放負,但放負得嚟又好搞笑,好似跌咗落河,就嚟衝落瀑布,仲一啲都唔緊張;到羅賓要佢夾計令其他百畝森林動物朋友信佢係羅賓,佢認得羅賓之後,同佢一齊做戲令動物朋友相信,會睇到咿唷勁過癮~會睇到好鍾意佢

Disney Movie Hong Kong
Photo from Disney Movie Hong Kong

《維尼與我》講嘅係重返初心,同埋唔好為咗成長、為咗生活,而忘記本來最重要嘅事。幾適合大人細路睇~

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook