荷里活25年後再現全亞裔電影《我的超豪男友》！楊紫瓊演野蠻奶奶大鬥ABC新抱！

講起以亞裔為主題嘅荷里活電影，上一部已經要數到1993年嘅《喜福會》（The Joy Luck Club），相隔25年，荷里活終於再度推出由全亞裔演員演出嘅新戲《我的超豪男友》（Crazy Rich Asians）！喺美國一開畫就成為周末最賣座電影，而好耐無同香港人見面嘅楊紫瓊仲擔演主要女角！

Photo from Warner Bros

呢套戲表面上同《喜福會》無咩關係，但說穿了，故事重心同樣探討華人大家庭價值觀同埋母愛。

電影由同名小說改編，講述平民出身、喺美國土生土長嘅「ABC」女教授麗秋（吳恬敏 飾），跟隨男友楊力（亨利高定飾）返對方老家新加坡「見家長」。正當麗秋一心想融入男友家庭，先知對方原來出身土豪世家，全家生活奢華揮霍、惟思想保守，更同自己玩針對！

楊力母親 （楊紫瓊 飾）更對呢位「門不當戶不對」嘅「半唐番」新抱諸多不滿，企圖拆散鴛鴦，一場地位懸殊又充滿火藥味嘅嘅婆媳鬥爭就此揭開！

Photo from Warner Bros

電影打破荷里活片對亞洲演員一貫嘅形象，戲中豪門浮華得嚟有血有肉，富貴背後各懷心事，故將搞笑、浪漫、溫情共冶一爐！

戲中「野蠻奶奶」楊紫瓊象徵保守、以家為本嘅傳統中國婦女思想，而「美國妹」麗秋則係獨立女性、敢作敢為，加上對華人習俗、上流生活毫不了解，搞出連場笑話。

Photo from Warner Bros

Photo from Warner Bros

麗秋要對付嘅，除咗係「野蠻奶奶」外，仲面對截然不同嘅婚姻、家庭觀念、外人對「窮人嫁入豪門」嘅輿論等，與華人日常生活息息相關，值得觀眾深思。

另一亮點係片中華麗拍攝場景，奢華大宅派對、星加坡名勝、小島靚景連連，單係靚人靚景、歌舞昇平大場面，足已令觀眾眼花繚亂！

Photo from Warner Bros

香港人認識嘅楊紫瓊大演霸氣惡媽媽，雖無同劇演員嘅喜感，但內心戲十足，表面嚴肅、目中無人，但背後為家人犧牲不少，更深藏秘密。

Photo from Warner Bros

另外留意佢喺戲中嘅流利英語對白，仲有講唔少廣東話！聽落份外有親切感！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）