9月玩盡澳門!煙花匯演嘉年華+文青景點

9月玩盡澳門!煙花匯演嘉年華+文青景點

Event 展覽及活動 · HotTalk 熱門話題 · Macau 澳門指南
By PressLogic on 04 Sep 2018

9月到10月將有中秋節同國慶等公眾假期,想「衝出香港」但又未諗到去邊?近近地過澳門就最好不過啦!唔單止有得睇一年一度嘅國際煙花比賽匯演、美食玩樂嘉年華同多個精彩活動,而且仲有靚景文青新景點!有得睇、有得食、有得玩,真係聽到都興奮!

唔經唔覺,終於㗇到澳門今年嘅重點活動-第29屆國際煙花比賽啦!今年總共有成十支來自世界各地嘅參賽隊伍,當中韓國、比利時、法國及中國嘅隊伍仲係首次粉墨登場!

隊隊都擁有豐富大型多媒體煙花表演經驗,唔少仲拎過國際大獎,實力超強!好似韓國隊就策劃過平昌冬季奧運會嘅煙花表演,菲律賓隊嘅煙花表演仲曾被列入健力士世界紀錄!認真厲害!

澳門特別行政區政府旅遊局
Photo from 澳門特別行政區政府旅遊局

澳門特別行政區政府旅遊局
Photo from 澳門特別行政區政府旅遊局

各隊將會為比賽出盡渾身解數,將煙花配合音樂、鐳射燈光等多媒體元素,喺澳門旅遊塔對出海面上演5晚、總共10場精彩煙花Show!

由9月開始每個星期六晚,連同中秋節同國慶當日,每晚都有兩隊演出唔同主題嘅煙花表演!每場表演都各有睇頭,配上澳門夜景夠晒吸引!

而且可以喺澳門唔同地標觀賞得到,例如澳門旅遊塔、觀音蓮花苑及澳門科學館一帶海傍、氹仔海傍、主教山山頂、南灣.雅文湖畔等。有得用多角度欣賞璀燦煙花,咁至夠難忘!

澳門特別行政區政府旅遊局
Photo from 澳門特別行政區政府旅遊局

澳門特別行政區政府旅遊局
Photo from 澳門特別行政區政府旅遊局

而比賽日嘅下午5時至晚上11時,喺澳門旅遊塔旁邊仲舉辦「火樹銀花嘉年華」,芸集各地美食、精彩表演及遊戲。嘩!咁咪可以邊嘆美食邊睇煙花囉!

仲未夠喉?小編推介大家玩埋澳門近年新景點「南灣‧雅文湖畔」!大家可以喺南灣湖上邊玩天鵝造型水上單車,邊欣賞對岸旅遊塔美景。仲有唔少特色餐廳Cafe、文創市集,仲不時舉辦手作藝墟,最啱輕輕鬆鬆Chill返日!

澳門特別行政區政府旅遊局
Photo from 澳門特別行政區政府旅遊局

澳門特別行政區政府旅遊局
Photo from 澳門特別行政區政府旅遊局

旅遊景點應有盡有,澳門真係愈來愈好玩!就連今年誕生嘅吉祥物「麥麥」都好過癮!佢係一隻揉合歐陸風圖案、東望洋燈塔嘅黑臉琵鷺,帶領旅客探索澳門呢個匯聚中西文化嘅大都會。

大家去遊覽澳門時,不妨留意吓見唔見「麥麥」嘅蹤影啦!

澳門特別行政區政府旅遊局
Photo from 澳門特別行政區政府旅遊局

第二十九屆澳門國際煙花比賽匯演
日期:2018年9月1、8、15、24日及10月1日
時間:晚上9時及9時40分
地點:澳門旅遊塔對出海面
官方網頁:http://fireworks.macaotourism.gov.mo/

南灣・雅文湖畔 
地點:澳門南灣湖景大馬路南灣湖
開放時間:早上11時-晚上10時

Presented By 澳門特別行政區政府旅遊局

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 holida[email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook