（不斷更新）北海道6.7級地震！新千歲機場今日班機取消 295萬多戶停電 厚真町大規模土石崩落?!

除左大阪有台風吹襲之外，係今日凌晨大約3點左右，北海道出現芮氏6.7級地震，除左有達6級嘅強烈地震之外，仲不停有餘震發生！

今次地震深度達37公里，但暫時無引發海嘯嘅危險。

新千歲機場將會取消今日所有嘅航班，所以今日原本會去北海道嘅朋友唔洗去機場喇～各航空公司亦會有唔同安排，建議先上航空公司詢問有關詳情可以點樣更改機票～

而北海道境內有多達295萬戶受牽連停電，唔少酒店都出現無水無電嘅情況～日本原子能規制委員會同北海道電力公司就表示因為北海道電力公司泊核電廠外部電源斷電，目前靠緊急柴油發電機持續冷卻燃料池中嘅使用過核燃料，所以呼籲未需要恐慌。

JR北海道亦今日亦宣佈停駛，而根室線（東鹿越駅～新得駅）、日高線（鵡川駅～様似駅）將會有接駁巴士繼續為大家服務～

JR東北新幹線亦會暫停所有駛往北海道嘅新幹線。

而地區都有好多道路都有倒塌情況，北海道境內暫時有好多交通受阻。

其中一樣大家好關心嘅事，就係北海道厚真町土石流嘅情況，係Twitter就有人上載左厚真町真係有大規模土石崩落嘅情況，附近仲有民居，消防部門公佈約有10棟房子倒塌，未知被活埋人數。

因為根據之前日本各地嘅大型地震，北海道仍然可能會有餘震出現，所以依家係北海道境內嘅朋友記得要留係安全地方暫避。

唔少人都話聯絡唔到係北海道嘅朋友，而政府就宣佈境內5800部嘅公眾電話亭都係免費使用。

以上資訊小編會繼續密切留意為大家更新。

Source：北海道氣象局、北海道電力公司、NHK、UHB

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）