download HolidaySmart 假期日常 app
《檢察狂人》7大看點!正義檢察官走火入魔走向偏執正義  情節並非一面倒嚴肅  意想不到會帶有笑點

《檢察狂人》7大看點!正義檢察官走火入魔走向偏執正義 情節並非一面倒嚴肅 意想不到會帶有笑點

時事熱話 生活熱話 電視電影 美食推介
By Rachel Lo on 07 Sep 2018
Deputy Managing Editor

未入場睇嘅時候已經知道卡士強大,有木村拓哉同二宮和也共演,要知道佢地兩個雖然同一間事務所,但甚少同場演出,而佢地都係演技實力派,再加上木村再演檢察官,點都會有睇頭!


故事講述新人檢察官沖野啟一郎(二宮和也 飾)被調派到東京地方檢察廳刑事部,跟隨精英檢察官前輩最上毅(木村拓哉 飾),合力調查一宗謀殺案。

edko filmsPhoto from edko films

案中嫌疑犯松倉同時牽涉25年前另一宗謀殺少女懸案,但因訴訟時效已過而未被起訴。而呢單案件受害者係同最上有關。

edko filmsPhoto from edko films

在激辯與審問之下,松倉堅決否認犯下今次呢單案,最上卻對他窮追猛打,並試圖影響沖野將松倉定罪,但沖野極度質疑最上武斷判決,二人激烈辯證自己相信的「正義」,師徒終於決裂。

《檢察狂人》以兩宗案件為中心,一共有7個必看看點。

首尾呼應
一開始就由精英檢察官最上同一班準檢察官講嘅一句話,已經帶出呢套電影其中一個主題。

edko filmsPhoto from edko films

「辨護律師常創作另一故事……你要有尋求真相的強烈意志,這就是你唯一的武器,檢察官若忘掉這原則,偏執自己的公義和故事,便會淪為罪犯」

而原本一直好尊敬、甚至敬仰最上嘅新人沖野,逐漸睇到最上點樣走火入魔,點樣成為當初最上再三提醒大家唔好成為偏執自己公義嘅檢察官。

所以到最後沖野對佢講:「檢察官若偏執一己的公義,便淪為罪犯。」首尾呼應,帶出更深嘅係痛苦嘅失望。

 

最上(木村拓哉 飾)黑化
以前睇木村演《律政英雄》都睇唔少佢做檢察官,不過當時佢演嘅係跳脫、正義不羈嘅檢察官,好多人都話佢經常都係做返自己。

但今次佢係做由「純白」走到「灰色」,再走向「黑色」嘅角色。當中比起二宮別角色挑戰更大,因為要由一個正直、遵守規則嘅檢察官,開始點樣引導搜查方向,後來再插贓,之後得知真相,仲要用自己嘅「正義」去懲罰犯人。

edko filmsPhoto from edko films

點樣偏執自己嘅公義,點樣走火入魔。

當嫌疑犯名單仲未出現松倉嘅名時,最上仲可以有公正判斷,但一睇到有呢個名嘅時候,佢嘅神情已經話畀觀眾聽,佢已經先入為主。

edko filmsPhoto from edko films

之後做嘅嘢唔係搵松倉有咩嘢「值得可疑」,而係諗「一定有咩證據證明佢就係犯人」。就算後來好多證據都指向真正犯人係另有其人,但佢都執著要係松倉身上搵到可疑嘅地方,甚至用盡黑白兩道嘅方法。

edko filmsPhoto from edko films

而多年好友丹野議員同佢講過而家嘅社會、法律都無辦法進行「正義」,以及丹野發生嘅事,更加推佢一把,用極端方法去懲治松倉,甚至要之前佢緊盯嘅黑市經理人幫手。

一步步成為最初佢警告過一大班新人檢察官唔好成為嘅一種人——「檢察官若忘掉這原則,偏執自己的公義和故事,便會淪為罪犯」

edko filmsPhoto from edko films

 

二宮迫問嫌疑犯 演技大爆發
有唔少人話二宮童顏,著西裝盤問嫌疑犯好無說服力。但戲中佢軟硬兼施,盤問諏訪部(松重豐 飾)、引松倉講出當年真相,到適當時候咄咄逼人嘅態度,仲模仿松倉令人毛管戙、用嘴發出嘅「卜」一聲,都營造出緊張氣氛,同埋嫌疑犯被迫到牆角嘅感覺。

edko filmsPhoto from edko films

 

對社會嘅控訴
值得一提嘅係電影都反映咗日本法律嘅問題,將案件設訴訟時效。

同埋當松倉嘅律師知道松倉係新案件應該唔會被告入,仲會為佢開party,即使知道佢好有可能係25年前嘅兇手。帶有諷刺,以及現實社會光怪陸離嘅現象。

edko filmsPhoto from edko films

而丹野身上嘅事發生咗之後,身於政治世家嘅妻子平日對佢不聞不問,到發生咗事之後,唔係真心傷心,而係要做畀政治家嘅阿爸、做畀傳媒睇佢有幾傷心,造作程度令人反胃。

edko filmsPhoto from edko films

 

2大配角形象鮮明 演技細膩
講起演技,值得注意嘅唔止係木村、二宮,仲有松重豐同酒向芳演技,都令到佢地飾演嘅諏訪部同嫌疑犯松倉形象鮮明。

松重豐,就算對佢呢個名感到陌生,但都一定聽過佢主演嘅《孤獨的美食家》。喺《檢察狂人》中,佢扮演狡猾、企喺灰色地帶嘅證人。

edko filmsPhoto from edko films

因為最上嘅背景而對佢好奇,甚至輔助最上、成就最上嘅「成魔之道」。完全推翻大家對佢喺《孤獨的美食家》嘅形象,鮮明將諏訪部呢個睇好戲嘅灰色地帶人士演得活靈活現。

而酒向芳飾演嘅松倉真係有種猥瑣感覺,尤其講起25年案件嘅神情,形容當年受害者嘅語氣,以及突然用嘴發出「卜」一聲,都令人有種噁心又驚又怕嘅感覺。

edko filmsPhoto from edko films

 

沖野對最上由敬仰變成充滿失望嘅過程
一開始唔難睇得出新人檢察官沖野對精英檢察官前輩嘅最上充滿敬仰,甚至視為目標。見到佢辦公室有個裝飾櫃,放滿收藏用嘅法官槌,同同期檢察官講起最上都係一臉尊敬表情。

edko filmsPhoto from edko films

當要同最上一齊負責案件,佢都會覺得開心,而且接受最上建議,盤開松倉時畀佢聽住,再聽佢指示。

edko filmsPhoto from edko films

只係當好多證據指向真兇唔係松倉﹐而係另有其人,但見最上都係死咬住松倉唔放,仲有好可疑嘅行動,開始對最上起疑,到最後更加對最上失望嘅過程,就係一直當佢係榜樣同目標嘅人,淪為罪犯行為嘅檢察官。

edko filmsPhoto from edko films

 

部分情節沉重帶搞笑
當你睇電影簡介會諗,一定係由頭到尾都係一套沉重嚴肅嘅懸疑電影。但其實中間穿插咗啲搞笑位,好似當最上老婆出場,因為佢嘅形象同木村現實嘅妻子工藤靜香有幾分相似,唔少觀眾都笑咗出嚟,同埋最上老婆拉二胡個下都係。

edko filmsPhoto from edko films

仲有沖野同佢嘅事務助理(吉高由里子 飾)嘅一啲互動,都會令觀眾笑一笑。應該係為咗令情節唔會顯得太沉重及冗長,而加插少量笑料。

edko filmsPhoto from edko films

不過電影嘅最後會令人有種未完結嘅感覺,而最後一幕嘅沖野同最上都略嫌誇張及突兀。

如果想睇到不一樣嘅木村、一個正義並完全「白色」嘅檢察官墮落到與黑道同謀嘅故事,《檢察狂人》唔會令你失望。

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel