古天樂成影壇巨星為父親爭一口氣 奪最佳男主角獎成父親最好嘅生日禮物

古天樂依家喺影壇有好好嘅發展，原來佢爸爸都曾經係粵語片演員。

古天樂生得靚仔又有明星相，其實佢爸爸都好有星味，古天樂父親古振光後生嗰時以藝名高峰出道做粵語片明星，仲曾經同吳君如父親夏春秋、張英材合作拍戲，不過未有大紅大紫，後來就轉行開時裝店。

睇返古天樂爸爸後生張相發現古天樂同爸爸都有幾分相似，古天樂唔單止遺傳爸爸帥氣外貌，亦都遺傳咗父親嘅演技細胞。

Photo from 網上圖片

古天樂1993年簽約tvb出道，飾演《神雕俠侶》嘅楊過而為人熟悉，2001年憑《尋秦記》大受歡迎。之後將重心轉向電影，拍咗多套港產片，為香港電影作重要貢獻，更加喺今年奪得香港金像獎最佳男主角添！

Photo from 古天樂 weibo

古天樂喺自傳入面提到：「當年父親長得比我英俊，而且也熱愛演戲，只是星運差了一點，這是父親的一點遺憾，所以，我今天的成績多多少少讓爸爸感到一些欣慰。換言之，我替父親爭了一口氣。」

所以喺奪獎當日，佢就話呢個最佳男主角獎係送俾爸爸最好嘅生日禮物！

Photo from 古天樂 weibo

古天樂唔止一次喺自傳到提及自己嘅爸爸係一個廿四孝父親，唔止煙酒不沾，為咗兩個仔努力工作，供書教學，一得閒就會帶全家去旅行，而且亦對妻子好好。

古天樂都受到爸爸影響，同樣咁重視家人，直至依家仍然堅持同父母同住，仲會抽時間陪兩老一齊去旅行。

古天樂非常孝順，唔單止會同爸爸慶祝生日同父親節，日前更加與曾經同父親合作過嘅世叔伯張英材等人聚會，提早慶中秋。

Photo from 林建明 facebook

依家嘅古天樂除咗做演員之外，亦係電影公司老闆，仲經常低調行善，相信佢爸爸一定會為個仔而感到自豪㗎啫！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）