download HolidaySmart 假期日常 app
北海道最高雲海溫泉 三大靚景秘湯 外加日本溫泉小守則

北海道最高雲海溫泉 三大靚景秘湯 外加日本溫泉小守則

旅遊攻略 旅遊優惠
By Charlotte on 28 Sep 2018
Editor

北海道受到早前地震影響,令佢哋經濟受挫,日本政府為咗振興經濟,提出優惠方案,由10月起,俾外國旅客住宿費3折優惠啊!咁好嘅機會,唔係唔去番轉啊?不過佢日本政府就無講優惠去到幾時啦,所以拿拿聲啦喂!去到北海道尼啲又有天然溫泉又有靚境嘅地方,緊係長途跋涉都要去秘湯體驗下喇!今次就同大家介紹下3個位於北海道嘅秘湯,同埋不可不知嘅日本溫泉文化喇!

1.豐平峽溫泉

定山溪觀光協會官網Photo from 定山溪觀光協會官網

即日來回佳選有係定山溪嘅豐平峽溫泉,採用100%全天然溫泉。有室外同室內溫泉,露天風呂環境亦都經過精心設計,溫泉四周都被樹林圍住,風景如畫,一年四季都去得,絕對係放鬆、散心嘅好地方。而且,溫泉入面嘅設計亦都非常人性化,石頭嘅大小同擺放嘅位置,係考慮到客人浸溫泉識嘅需要設計,俾人坐係度又得,訓係都亦得,得咗!
唔係講笑,真係好似係森林中央浸緊溫泉咁㗎,真係好壯觀㗎~

定山溪觀光協會官網Photo from 定山溪觀光協會官網

哇~冬天你睇睇,小編諗起獅子女巫魔衣櫥個景...

定山溪觀光協會官網Photo from 定山溪觀光協會官網

地址:札幌市南區定山溪608-2(新千歲機場及札幌均有專車前往)
電話:011-598-2410

2.丸駒溫泉旅館
如果唔想即日來回咁趕,可以住下當地嘅溫泉旅館,俾你日浸夜浸都得啊,仲可以食埋懷石料理添啊!同樣有室外同室內風呂選擇。但小編覺得黎到北海道,當然要去室外風呂浸番夠本喇!尼間溫泉旅館嘅特色就係建於支笏湖畔,溫泉水由水門流入湖中,而湖底就自然將溫泉水加溫之後湧出。因為咁天然嘅關係,要注意嘅係溫泉嘅深度係會因應湖水本身而變㗎~
秋天望住充滿秋葉嘅樹木~

丸駒溫泉旅館官網Photo from 丸駒溫泉旅館官網

冬天,地上滿滿都係雪,望住成水平嘅湖景,好浪漫啊~

丸駒溫泉旅館官網Photo from 丸駒溫泉旅館官網

地址:北海道千歲市支笏湖幌美內7(JR千歲站,轉乘往支笏湖巴士約50分鐘車程,支笏湖巴士站乘搭已預約接駁巴士)
電話:012-325-2341

3.十勝岳溫泉凌雲閣

十勝岳溫泉凌雲閣官網Photo from 十勝岳溫泉凌雲閣官網

對樹林、湖景無興趣無緊要,俾多個選擇你。雲景夠勁喇掛~皆因佢係係北海道最高行車點嘅溫泉啊!!!望到壯觀嘅山景,好彩嘅話,望到雲海添啊~同樣有住宿,不過房就少啲,得13間。

十勝岳溫泉凌雲閣官網Photo from 十勝岳溫泉凌雲閣官網

地址:北海道空知郡上富良野町十勝岳温泉(JR富良野站,轉乘巴士,車程約50分鐘)
電話:0167-39-4111

入鄉隨俗,禮儀知多啲!
1.身外物只留係更衣室
大家千奇唔好諗住好似平時去泳池游水咁,去到池邊先除衫啊,唔可以㗎!因為當你一離開更衣室,進入淋浴間同溫泉個刻,唔該,我淨係要見到你嘅裸體!因為如果一唔小心,將衣物掂到泉水,可能會令泉水變質㗎~

PinterestPhoto from Pinterest

2.為人為己,請先洗白白
係日本,污染公共浴場係違法嘅行為。溫泉係共用嘅空間嘅,由於衛生問題,為己為人,大家一定要先洗乾淨自己嘅身體,再去浸啊!

PinterestPhoto from Pinterest

3.肉帛相見是常識吧!
浸溫泉係日本嘅文化,但係香港好少機會俾大家肉帛相見,所以去日本浸溫泉嘅時候,好多遊客都會用條毛巾遮住自己嘅身體落溫泉。但係其實係日本,同溫泉水有接觸嘅只可以係各位嘅肌膚,連頭髮都要綁番起。仲有!唔好以為卡通片先有,其實啲日本人自己都會將條毛巾放係頭上面㗎~咁樣係用黎散熱,避免腦充血。不過記得毛巾要浸過凍水先得啊~

PinterestPhoto from Pinterest

4.不自量力,笑你
唔係成日浸溫泉嘅朋友,記得沖完身要用勺子盛啲溫泉水淋下個身,俾自己身體適應下個溫度先再浸喇~如果身體負荷唔到,就唔好勉強喇,心臟太大負擔,好容易會頭暈甚至昏迷㗎~

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel