千祈唔好得罪女人！《小心幫忙》閨蜜之間虛偽嘅友誼 Anna Kendrick同Blake Lively大鬥演技

By Rachel Lo on 06 Oct 2018

Deputy Managing Editor

成日會聽到有人話「千祈唔好得罪女人」、「女人要可怕起嚟可以好得人驚」。當睇《小心幫忙》嘅時候，就會不自覺諗起呢兩句說話。
Photo from Intercontinental Film

《小心幫忙》（A Simple Favor）講述單親媽媽KOL史蒂（Anna Kendrick飾）喺阿仔學校識到米莉（Blake Lively飾），無耐就成為閨密。史蒂羨慕米莉擁有嘅一切：體貼嘅丈夫、有品味嘅生活。有一日米莉搵史蒂幫忙接小孩下課，卻從此人間蒸發。警方懷疑兇手是米莉嘅丈夫（亨利高定飾），甚至史蒂。
Photo from Intercontinental Film
成套戲節奏緊湊，當Blake Lively一出場，已經吸引全場觀眾嘅目光，而且明明呢個角色性格本來就唔討人歡喜，毒舌高傲、自私、咄咄逼人，仲要講大話唔眨眼，但佢就係無辦法令人完全討厭，仲會有種無法言喻嘅神秘魅力。

Photo from Intercontinental Film

而Blake Lively將呢種令人又愛又恨嘅角色，演得出神入化，明明知道佢唔係一個好人，仲會下下食住上，自私自利，同時又會令人明白點解戲入面咁多人為佢著迷。

Photo from Intercontinental Film

劇情發展充滿張力，全場無悶場，仲節奏明快緊湊，揭開一個個秘密，會有種「估佢唔到」嘅感覺，到底點解米莉會失蹤？有人殺咗佢？如果係，又係邊個殺咗佢？定係佢自殺？

Photo from Intercontinental Film

成套電影都係睇住Anna Kendrick同Blake Lively嘅表演，Anna Kendrick嘅角色變化都好自然，開始時佢真心崇拜米莉，到米莉老公同米莉嘅互動，睇到史蒂眼中除咗尷尬、羨慕，仲有絲絲嘅妒忌。

同為女人，同為人母，但米莉有人人羨慕嘅工作，公司同老公無咗佢唔得，仲有佢舉手投足散發嘅自信同魅力，都叫史蒂相形見絀。

Photo from Intercontinental Film

但佢不斷咁成長，將米莉當初同佢講嘅活學活用，由傻白甜變成一個機智嘅女人。

睇住呢兩個女角色嘅虛情假意，愈睇落去愈覺「千得罪萬得罪，都唔好得罪女人」。

劇情驚喜不斷，而且好難預計到套戲入面嘅角色會採取咩行動，同埋佢地抱有咩想法，令到觀眾好專注劇情上，緊湊到就算好攰入場，都會好集中、唔會有一下失神。
Photo from Intercontinental Film
不過由於劇情發展出色，會令人對結局抱有期望，想知道會點樣結尾，所以會有與期望存在落差，會與劇情相比之下，呢個帶有少少公式化嘅結局略嫌失色。