一將功成萬骨枯!《登月第一人》成為首個上月球嘅太空人前  背負不為人知嘅壓力同不安

一將功成萬骨枯!《登月第一人》成為首個上月球嘅太空人前 背負不為人知嘅壓力同不安

Hong Kong 香港食玩 · Life 本地生活 · Movie 電影 · HotTalk 熱門話題
By PressLogic on 12 Oct 2018

《La La Land》男主角賴恩高斯寧最近擔任《登月第一人》男主角,出演歷史上第一位登上月球嘅太空人。電影著筆嘅唔係「阿波羅計劃」,而係登月第一人Neil Armstrong。

Universal Pictures HK
Photo from Universal Pictures HK


由首位登陸月球太空人尼爾岩士唐傳記改編,以岩士唐為中心,敍述美國太空總署於1961至69年間籌備及完成登月任務嘅故事。尼爾岩士唐(賴恩高斯寧 飾)參與美國太空總署(NASA)的太陽神計劃,進行史上首個載人登陸月球的任務。在這太空科技剛起步時代,國家不惜工本,甚至犧牲性命,誓要達成史無前例嘅成就。

Universal Pictures HK
Photo from Universal Pictures HK

入面與其話講「太陽神計劃」幾咁成功,不如話係講上月球前太空人要做嘅艱辛準備、壓力、生命危險,仲有不安。

因為太空人喺訓練嘅時候,進行正常人無辦法承受嘅一啲訓練,而呢啲訓練緊接住理論課程,同時實踐訓練又會隨時有生命危險,不斷有要快速完成嘅壓力,因為蘇聯同美國嘅太空科技競賽,只要蘇聯又有太空科技進一步,美國就會更大壓力要盡快完成。

Universal Pictures HK
Photo from Universal Pictures HK

從Neil角度睇登月球呢件事,睇住隊友一個個為任務而犧牲性命,明知要冒好大生命危險都要去嘗試。

但當中電影中描繪出殘酷嘅現實——當登上月球嘅任務尚未成功,太空人因為訓練而出意外,國民就覺得太空計劃花費巨款,應該將啲錢放喺民生,而唔係放喺太空,更加遷怒於已故太空人嘅家人身上。

Universal Pictures HK
Photo from Universal Pictures HK

而Neil完成到登上月球嘅任務時,就好似成為英雄咁。而佢嘅成功除咗自身嘅即時應變同能力,仲有隊友之前嘅努力,睇到會有種「一將功成萬骨枯」嘅感覺。

Universal Pictures HK
Photo from Universal Pictures HK

同埋Neil屋企都係另一條線,可以睇到太空人嘅家人唔會好期待佢地可以上太空,相反係會一直好擔心、不安,睇住市民不斷反對太空計劃嘅矛盾。

而Neil上月球前一晚執行李,面對老婆追問佢係咪未必會返到嚟,佢不斷迴避,到老婆迫佢同兩個小朋友講「可能係最後的對話」。

Universal Pictures HK
Photo from Universal Pictures HK

大仔問到佢係咪可能會返唔到嚟,同佢登月前記者會回答問題形成對比;對記者,佢可以耍官腔迴避,但面對自己個仔,佢想含糊帶過,不過唔成功,無辦法直視大仔,講出可能真係會返唔到嚟嘅事實。

Universal Pictures HK
Photo from Universal Pictures HK

當下有種好真實嘅惑覺,成就一個創舉前當中要背負嘅覺悟、壓力,以及隊友們嘅犧牲,成功光芒背後嘅付出。

不過《登月第一人》主要以hand held方式拍攝,有啲鏡頭會搖晃得比較厲害,特別係一啲影到太空儀器同有危險嘅鏡頭,就會更為明顯,睇起嚟會有少少暈。

Universal Pictures HK
Photo from Universal Pictures HK

《登月第一人》
上映日期:10月11日

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook