download HolidaySmart 假期日常 app
【嫁到這世界邊端2】因為深愛因為相信 普通sales女苦養失業瑞典老公12年 1人苦捱養3人

【嫁到這世界邊端2】因為深愛因為相信 普通sales女苦養失業瑞典老公12年 1人苦捱養3人

美食推介
By Charlotte on 12 Oct 2018
Editor

琴晚集《嫁到這世界邊端2》嚟到第3個愛情故事,今次真係飛到邊端,係世界差不多最北邊 - 瑞典啊!呢個故事,可以用4個字概括,就係苦盡甘來。

mytv截圖Photo from mytv截圖

毛毛嘅過去

mytv截圖Photo from mytv截圖

嫁到去瑞典最北邊嘅女主角毛毛,第一段婚姻喺未夠20歲就開始咗,仲生埋女女,不過好快就發覺前夫唔係一個可以共度餘生嘅人,24歲嘅佢成為單親媽媽。一個離過婚又帶住個女嘅香港女仔,之後嘅感情路都唔順遂。雖然隨後都有唔少香港男士追求,但係一提到自己離婚同帶住個女,關係就無疾而終。

相識經過

mytv截圖Photo from mytv截圖

毛毛係喺交友app上面認識同自己同齡嘅現任老公Johan,當時Johan話自己嚟自瑞典,毛毛都直情未搞清瑞典係邊度。毛毛就係中三畢業嘅普通售貨員,而且英文又唔好,但係Johan當時就係一位設計學系大學生,不過有一件事係佢自己都估唔到。

Johan媽媽非常支持

mytv截圖Photo from mytv截圖

Johan俾咗毛毛嘅相自己媽咪睇,並且話俾佢知佢係有小朋友同離咗婚,媽咪即刻:「吓?」以為媽咪反對?並唔係,而係:「好喎!呢啲女人好喎,成熟喎,阿仔你去搵佢啦」

Johan賣樓飛香港搵女友

mytv截圖Photo from mytv截圖

Johan聽完媽咪講之後,就決定賣咗自己喺瑞典嘅物業,帶住二十萬旅費,飛嚟香港搵毛毛。當時住喺毛毛屋企,亦希望可以喺香港發展。不過Johan當時係拎旅遊簽證,每次只能留3個月,咁樣來來回回甚至被入境處以為佢喺香港非法工作,仲話下次就會將佢遣返瑞典。

為愛裸婚

mytv截圖Photo from mytv截圖

為咗繼續二人嘅愛情,毛毛同Johan決定裸婚,令Johan可以成為港人配偶,繼續留喺香港發展。之但係Johan當時嘅旅費都所剩無幾,兩人資金不足,所以無擺酒,甚至結婚戒指都係由毛毛自己買對幾百蚊嘅。

終要面對殘酷的現實

mytv截圖Photo from mytv截圖

Johan之前喺瑞典讀設計,可惜瑞典人Johan唔識睇唔識講中文,搵工4年都未有公司聘請。毛毛係一位收入有限嘅普通售貨員,同時要養爸爸、女兒同老公。身兼多職,毛毛平時返工,放工又要返屋企煮飯。而老公就每日坐喺電腦面前,而毛毛唔知佢做緊咩。

因為愛所以選擇相信

mytv截圖Photo from mytv截圖

毛毛好堅定表示:「其實我好信佢,佢真係好有才華,佢真係專業嘅」「我覺得係要互相支持,唔可以話一個唔掂嘅時候,我就要走,就要同佢計,我計有咩意思呢?無意思㗎」即使Johan後期自己開公司接單,收入卻非常唔穩定,就係咁樣,毛毛一個人撐起頭家,足足12年。

保護老公面子 心酸只有自己知

mytv截圖Photo from mytv截圖

明白如果外人知道呢12年都係靠毛毛養家養老公,老公可能會好無面,所以毛毛並無向其他人講得太多家事。自己朋友覺得毛毛好幸福,嫁到個外籍設計師老公,但係心酸又有邊個知?甚至Johan嘅朋友講過,「其實你太太咁嘅樣,你可以搵過個好啲㗎喎。」令毛毛不禁反思自己到底係咪真係咁差,幸好毛毛嘅性格硬朗,為咗佢哋之間嘅愛情,佢苦學英文增值自己。佢話:「只要呢個人係同我到終老嘅,我會用最大努力心機喺呢個人度,我係唔會放棄」

生活嘅重擔成為感情阻礙

生活重擔帶來好多影響,二人試過分手,Johan仲試過約其他女人。毛毛堅持挽回,因為當初所有男人都嫌棄佢嘅時候,只有Johan選擇愛佢,所以佢都要不離不棄。

愛情無分性別尊卑

mytv截圖Photo from mytv截圖

毛毛話:「你唔好諗性別嘅關係啊,如果佢係一個女仔,佢嚟香港搵我,如果佢搵唔到嘢做,我係咪應該同佢離婚?」「我覺得我係因為愛佢,所以感動到佢」

辛苦多年終於苦盡甘來

mytv截圖Photo from mytv截圖

而原來喺老婆出去返工嘅時候,Johan對住電腦唔係百無聊賴,而係不斷上網自學。去到第13年,Johan終於俾大公司請做設計師。當Johan出第一份糧後,兩公婆如常去超市買嘢,結帳時一般都係毛毛俾錢,但係嗰次要俾錢時,Johan拎咗自己張卡出嚟。毛毛:「其實呢個動作好多女士眼中會覺得好應份,但嗰陣佢俾錢嗰刻,我流咗一行眼淚」

瑞典設計公司聘請

喺香港做咗一年嘢,Johan得到一間瑞典設計公司嘅聘請,所以就決定帶毛毛返瑞典並且供養佢,俾佢做幸福少奶奶。

生活終漸變穩定 毛毛不忘當初

mytv截圖Photo from mytv截圖

老公收入穩定返,向毛毛提議買番隻鑽石戒指俾佢。但毛毛拒絕咗,覺得要返當初對結婚戒指就足夠。後來問返Johan,佢表示覺得自己當時好唔成熟好內疚好慚愧,係毛毛令佢變成一個更好嘅人。

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel