冬季限定!人生必去冰島超夢幻藍冰洞 化身《冰雪奇緣》Elsa進入冰雪王國~

冬季限定!人生必去冰島超夢幻藍冰洞 化身《冰雪奇緣》Elsa進入冰雪王國~

World 世界旅遊 · Heaven 天堂風景 · 打卡之選
By PressLogic on 15 Oct 2018

「藍冰洞」可以話係冰島最有特色嘅自然景觀,只有喺冰島先可以睇到,而且仲係冬季限定添!

藍冰洞只喺每年冬季嘅11月~3月形成,因為形成冰洞嘅冰係由夏季冰川融化嘅冰水凝結而成,夏天融化嘅水流過冰川底下,形成一個地下通道,到溫度極低嘅冬季就會凍結成冰洞。

shutterstock
Photo from shutterstock

shutterstock
Photo from shutterstock

shutterstock
Photo from shutterstock

由於每年嘅氣溫都唔一樣,冰川融化嘅速度都有所不同,所以藍冰洞嘅大細、結構、數量、位置年年都唔同,亦都因為呢個原因,喺藍冰洞入面嘅每一剎那都係唯一,錯過就唔會再見到㗎喇!

藍冰洞同普通冰洞最大嘅分別係形成藍冰洞嘅冰會吸收晒除咗藍色之外嘅其他顏色,而且氣泡含量低,令光線可以直接照入內部,所以藍冰洞入面啲冰嘅顏色睇落特別藍。

shutterstock
Photo from shutterstock

shutterstock
Photo from shutterstock

想去冰洞遊覽只有一個方法:就係參加當地旅行團。主要原因有兩個,首先因為藍冰洞位於冰川中央,如果無改裝過嘅大型吉普車根本就無辦法安全咁喺冰川上面行駛,而且無專業導遊準確嘅GPS定位係好難搵到冰洞嘅確實位置。

第二個原因就係由於藍冰洞係全天然形成,每年結構都唔同,要由專業嘅冰川導遊、測量人員事先入冰洞入面勘探安全性先可以開放俾遊客遊覽,而遊客入去藍冰洞之前亦都要戴好冰抓同頭盔等安全裝備,以免發生意外。

shutterstock
Photo from shutterstock

shutterstock
Photo from shutterstock

入到藍冰洞就可以欣賞到透住藍光嘅冰喇!小編建議大家帶埋三腳架入冰洞輔助拍攝。

另外,由於入冰洞係需要戴頭盔嘅關係,如果唔想影到個頭盔,除咗後期P圖之外仲有一個方法,就係著連帽外套喇!笠住外套頂帽就可以遮到個頭盔啦~

藍冰洞真係好藍好靚,入到去就好似入咗冰雪世界咁,大家可以唱返首《Let It Go》添!

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook