《屍殺片場》評語兩極化!頭半個鐘似好爛嘅喪屍片  後半部大扭轉  會令人想再睇多次

《屍殺片場》評語兩極化!頭半個鐘似好爛嘅喪屍片 後半部大扭轉 會令人想再睇多次

Hong Kong 香港食玩 · Life 本地生活 · Movie 電影 · HotTalk 熱門話題
By PressLogic on 26 Oct 2018

《屍殺片場》喺日本低成本製作嘅日本電影,只用22萬港幣就拍出呢套電影,但喺日本票房就收得好好。不過評語就好兩極化,一係就好鍾意,一係就覺得唔好睇,點解評語咁唔同?

名威影業
Photo from 名威影業

故事講一個劇組嚟到渺無人煙嘅廢棄濾水廠,拍攝低成本喪屍電影,但因為演員演技做唔到導演嘅要求,令到導演大發雷霆,但突然真係有真嘅喪屍走出嚟「追擊」佢地,追住佢地嚟咬。導演覺得機不可失,就keep住拍攝,覺得終於拍到演員好真實嘅表情,就要拍出迫真嘅「37分鐘一鏡到底」喪屍電影。

名威影業
Photo from 名威影業

頭37分鐘會真係有種想要離場嘅感覺,好似製作好粗糙嘅喪屍電影,但當撐過37分鐘,就開始明白頭37分鐘係發生咩事,而且原來每個鏡頭背後都有唔同嘅原因。而且呢套戲係將「戲中戲」發揮得淋漓盡致~

名威影業
Photo from 名威影業

37分鐘後嘅故事發展係唔少拍過片嘅人都會有嘅共鳴,有時拍攝經過同環境不似預期,就只可以「執生」,錯有錯著,要台前幕後大家合作,最後先會出現係觀眾眼前。睇到打後嘅劇情,先會對頭37分鐘嘅過程有種恍然大悟嘅感覺。

名威影業
Photo from 名威影業

本來可能對頭37分鐘某啲鏡頭唔理解,但到後面就大約明白係咩一回事。

打後嘅劇情發展,令部分觀眾慢慢鍾意呢套戲,覺得好似喜劇咁,同時啲甩轆位幾真實,會有種想睇返頭37分鐘,用嚟對比一下,係咪真係咁,仲會前後呼應到。

名威影業
Photo from 名威影業

相信令平時拍攝開嘅工作人員好有同感嘅,係喺資金唔多、時限迫在眉睫、發生好多意外,但都一定要繼續喺有限嘅環境下,靈活變通拍埋落去。

名威影業
Photo from 名威影業

單睇後半部都會覺得演員會演得幾開心,因為後來真係幾好笑,同埋帶出有時事態發展未必如想像,但係只要「執生」,就可能得到意想不到嘅好結果。當中除咗搞笑,仲有溫情同團隊精神。

名威影業
Photo from 名威影業

由大家各有各想法、一盤散沙,到面對難以解決嘅問題,所有人都好自然咁團結一致,只係為咗想好好咁完成件事,變成搞笑得嚟又有少少熱血嘅電影。

名威影業
Photo from 名威影業

不過會有部分觀眾未必接受到頭37分鐘,然後就算大扭轉,如果get唔到笑點就會覺得有啲沉悶,所以可能令評語兩極化就係呢個原因~

《屍殺片場》
上映日期:10月25日

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到[email protected],直接將資料傳比小編)


Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 [email protected]比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic

Share to Facebook