聽到咀嚼聲、BB喊聲會即時燥底？研究：你可能有「恐音症」

如果你對雜聲特別敏感，例如會因為聽到附近有人食嘢嘅咀嚼聲、刀叉刮碟聲、他人呼吸太大聲等，而感到「燥底」或不安嘅話，其實你一啲都唔奇怪，你只係同世界上好多一樣都有「恐音症」（Misophonia）。

「恐音症」至今喺主流醫學界臨床尚未有清晰定義，泛指患者會對生活中某種聲音異常敏感，當重複聽到呢啲聲音時，身體就會產生負面情緒、想法同反應。2014年《臨床心理學雜誌》一項研究更指出，全世界人口當中就可能有20%嘅人受到「恐音症」音困擾。

Photo from google

「恐音症」患者之所以比一般人對雜聲敏感，係因為佢哋大腦情緒控制機制同一般人唔同，喺聽到厭惡嘅聲音時，負責連結感官同感情嘅前腦島皮層（anterior insula cortex），即腦內連結感官與感情嘅部分，表現得過度反應，引起憤怒、甚至恐懼等情感。

外國有研究搵嚟20位「恐音症」患者同22位非患者，邊聽唔同雜聲邊進行腦掃描，包括雨聲、尖叫聲、咀嚼聲等多種日常生活聽到嘅聲音。結果顯示，患者聽到咀嚼聲等由聽到他人觸發嘅聲音時，佢哋嘅腦內連結感官與感情的部分會變得過度活躍，令佢哋心跳加快同冒汗，而且愈聽得耐，會由正常憤怒嘅反應，慢慢變得敏感、憎惡。

Photo from Google

Photo from google

人聽到雜聲或多或少會影響情緒，情況唔嚴重、唔會持續長時間嘅話其實唔需要太擔心。但如果嚴重到影響生活嘅話，就要尋求治療同幫助啦！

資料來源：The Brain Basis for Misophonia

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）