請珍惜死黨摰友！研究：朋友比家庭更影響健康同朋友關係好會更長壽

By Mag on 06 Nov 2018

Digital Editor

俗語有話「朋友貴精不貴多」，人生能得幾位關係親密嘅知己密友，都比「相識滿天下」但無人明白自己幸福。說話無講錯，外國有研究證明：朋友比家庭更影響健康，而且有知心好友嘅人比孤獨者更長壽！

澳洲有社會學研究發現，擁有好朋友對身心有正面作用，同朋友關係好嘅人會比他人長壽 22%，但同親戚嘅關係反而對壽命影響不大。另外，集合近150項嘅臨床綜述有關超過30萬人每人平均7.5年嘅數據，不論唔同年齡、性別、健康狀況同死亡原因，都反映同社會關係密切嘅人比起疏離嘅人，生存機率會高50%。

Photo from shutterstock

雖然現今社會流行講「毒男」、「毒女」，但研究人員就指出，幾乎無親密朋友嘅人，面對嘅健康風險如同每日吸15支煙，比癡肥或唔做運動更減壽㗎！換句話講，感覺遭受孤立、隔絕同孤獨，係足以影響我哋壽命嘅長短。

Photo from shutterstock

或者你可以話自己網絡媒體上「相識滿天下」、不愁寂寞。不過牛津大學人類學家Robin Dunbar指出，其實每個人「真正嘅朋友」只有一小撮，因為友誼係分唔同層次：人大概只有1、2 個真正要好嘅朋友，關係中會存在「照顧」、「在乎」等價值，關係密切經常互動嘅朋友約10 個，但其他各種各樣「友好但就唔算上係朋友」嘅就可以達150個。所以朋友唔需要多，最重要係有感情深厚嘅知己！