全新旅遊節目《堅離地》！陳嘉倩/達哥x杜小喬/林曉峰x西瓜離地去旅行 親身嘗試當地最「離地」產品同服務

《堅離地》係一個體驗富豪、品味生活嘅節目。幾位主持會去杜拜、日本、北韓等國家，親身嘗試當地最名貴嘅產品或者服務，體驗一下「離地」嘅生活，了解呢啲奢侈品係咪真係物有所值。

而每集仲會結算一個普通香港人如果唔住唔食唔買，到底要做幾多日嘢先可以買得到呢啲天價產品？

頭7集係陳嘉倩同導遊Rubio、Jamie一齊去北韓，攝製隊放棄遊客唯一嘅交通工具旅遊巴，破天荒申請喺平壤拍攝搭的士，感受北韓嘅另一種「離地」。

林曉峰同西瓜兩個就齊齊遊杜拜，入住「7星級」酒店，用埋「千足黃金提金機」提金，夠晒豪氣！

日本大家都去得多，達哥林慧韡同杜小喬今次去日本就體驗咗真正嘅「離地遊」，成個trip都離地到你唔信！

睇下面3樣產品你就知究竟有幾離地喇！

1. 全世界最奢侈礦泉水

呢支礦泉水號稱係全世界最奢侈，樽身鑲咗水晶而且仲有金箔裝飾。入面載住來自日本神戶嘅布引水。一支嘅價格抵得上10餐！

2. 全球最貴Cocktail

Photo from 《堅離地》

六位數嘅Cocktail你飲過未？位於東京Ritz-Carlton酒店45樓頂層嘅酒吧，由全日本最頂級嘅調酒師為你調製一杯全球最貴的Cocktail。

3. 日本皇室御用廁紙

Photo from 《堅離地》

日本「羽美翔」係以加拿大最優質木漿同日本最潔淨河川仁淀川嘅河水製成，有報道指，「羽美翔」五年嚟都是日本皇室御用品。

想知個價格係咪真係咁離地？咁就要留意星期一至五夜晚10點半喺Viu TV播出嘅《堅離地》喇！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）