小學雞時代嘅聖誕聯歡會 你必定做過嘅7件事!仲記唔記得呢?

小學雞時代嘅聖誕聯歡會 你必定做過嘅7件事!仲記唔記得呢?

生活熱話
ByHeidi on 18 Dec 2018 Digital Editor

大家小學時代最期待一定係聖誕節啦‌!因為開完Party之後就可以放長假!諗起都開心!你仲記唔記得小學聖誕聯歡會必備環節有咩呢?小編就總結咗幾件聖誕聯歡會會做嘅二三事~唔知你仲記唔記得呢?

1. 便服日
聖誕聯歡會係難得可以著便服返學嘅一日!每人都會盛裝打扮返學,女仔會戴住五顏六色嘅頭飾、媽咪幫手扎嘅孖辮,男仔會著住帥氣嘅裇衫、閃令令嘅波鞋。個個都咁可愛~你又記唔記得你細個係著咩「戰衣」去聖誕聯歡會呢?

shutterstock
Photo from shutterstock

2.校長扮聖誕老人
仲記得聖誕聯歡會第一個環節一定係禮堂集會,唱曬詩歌之後,「聖誕老人」就會一邊派糖,一邊「Ho!Ho!Ho!」咁行出嚟,雖然佢痴住厚厚嘅白鬍鬚、著住紅噹噹嘅聖誕老人服裝,但你都會認得出佢就係每朝都會企喺學校門口同你講「早晨」嘅校長。

shutterstock
Photo from shutterstock

3. 集體遊戲
完咗集會,緊係跟班主任返自己班房開始Party,玩遊戲啦~估領袖、朱古力波彈彈波、解手、爭凳仔、老師話、糖痴豆、大風吹、收買佬⋯⋯呢啲經典集體遊戲,你又玩過幾多個?
通常都係由全班最曳嗰個勝出所有遊戲,大家仲記唔記得呢位同學係邊個?

shutterstock
Photo from shutterstock

4.交換禮物
每個Party必備嘅交換禮物,總係有人歡喜有人愁!一定會有人好俾心機準備一份又實用又好睇嘅禮物,但同時又會有人完全忘記咗呢件事,俾同學提一提先臨時臨急買包糖,或者喺書包拎包紙巾再搵廢紙包一包就算。細個收到一定會喊出嚟呀~

shutterstock
Photo from shutterstock

5. $10聖誕禮物包
交換禮物結果不如人意,唔緊要!仲有人人都有嘅聖誕禮物包!喺聖誕聯歡會前幾星期,學校就會派通告叫你買,雖然知道入面嘅禮物好多都係唔等洗嘅東東,但只不過係$10蚊,而且全班都有訂,所以你都會乖乖訂埋一份!禮物包會用聖誕襪袋住啲小禮物,入面會有小喇叭、紙帽、拍拍手、士的糖、智力玩具、頭飾、氣球等等。大家一收到就會拎小喇叭出嚟吹,成個班房都係「BU!BU!」聲,嘈到拆天!

廣告
廣告

taboo
Photo from taobao

6. 菠蘿腸仔
講咗咁耐,又點少得美食呢?通常小學都唔會叫到會,而係由班主任列出一張美食清單,俾同學自己揀負責咩食物。咖哩魚蛋、燒賣、啫喱糖、雞翼、三文治⋯⋯呀!點少得爭啲冇得再食嘅菠蘿腸仔呀!簡單嘅菠蘿加腸仔就已經係一道人間美食喇!

盆滿缽滿
Photo from 盆滿缽滿

7. 人人有份聖誕卡
以前寫聖誕卡,係會一次過寫幾十張,寫曬俾全班同學,人人有份永不落空!通常一張聖誕卡就睇到你地有幾Friend~得一句「Merry Christmas」嘅,睇嚟你地都唔係咁熟~好朋友就會好有心機喺聖誕卡上畫畫、貼貼紙!仲有走音音樂聖誕卡呀,雖然走曬音,而且卡嘅設計老土,但收到都會好開心!不過無論係咩Style嘅聖誕卡都係一份祝福嘅心意!而家想收到一張手寫聖誕卡都好難啦。

Bigabuy IG
Photo from Bigabuy IG

taobao
Photo from taobao

taboo
Photo from taobao

諗返起都好懷念以前啲聖誕聯歡會呀~出嚟做野就再冇咁無憂無慮嘅聖誕Party啦~仲讀書嘅你地記住好好珍惜之後嘅聖誕聯歡會啦!

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook