清邁雙條車要講ByeBye？泰官員：雙條車唔適合發展需要 會發展地鐵

泰國嘅「迷你巴士」雙條車（Songthaew）可以話係當地嘅獨有特色，喺港人成日去嘅清邁、曼谷、芭達雅、華欣、蘇美島等地都見得到。不過清邁嘅雙條車有機會要同大家道別啦！

據泰國《世界日報》報導，泰國交通部常務次長猜瓦出席研討會，就清邁城市發展發表講話。佢直言以目前雙條車為主要交通工具嘅交通模式，已經唔適合清邁嘅發展需要，為解決清邁日益嚴重嘅交通問題，需要再規劃運輸系統同設施。

Photo from shutterstock

佢指清邁城市不斷發展，交通擠擁都愈來愈嚴重，市內行駛5至6公里都可塞車達1小時。所以為方便居民生活，當局不但會鼓勵居民多使用單車、步行去舒緩行車路堵塞，同時發展地鐵。據講泰國總理已批准興建清邁第一條設12個車站嘅地鐵線，預計明年完成設計，2020年開始動工，最快2024年投入服務。

Photo from shutterstock

Photo from shutterstock

清邁觀光人數大幅增長，但古城本身嘅道路難以再拓寬，作為主要交通工具嘅雙條車有限載客量確實難以應付。加上發展地鐵有利推動沿線周邊地區嘅經濟發展，當局提出呢個方案亦無可厚非。

Photo from shutterstock

論雙條車會唔會喺清邁完全消失暫時言之尚早，不過隨著城市發展，逐步降低雙條車嘅供應係大勢所趨。相信大家未來去清邁觀光會見到不一樣嘅景貌啦！

資料來源：泰國《世界日報》

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）