【單身狗福音】為免單身員工眼冤！日本餐廳平安夜及聖誕禁止情侶入店！

單身狗喺平安夜同聖誕節都係不宜出街啦～因為分分鐘會俾情侶放閃閃盲！

不過喺日本好多餐廳就推出咗一項德政！就係喺平安夜同聖誕節呢兩日禁止情侶入店。

Photo from shuttestock

呢間「吉祥寺どんぶり」每年聖誕都會張貼呢張告示，上面大字列明喺平安夜同聖誕節期間（12月24日至25日），禁止情侶入店！

Photo from j-town.net

餐廳負責人解釋係因為要照顧單身員工喺節日都要工作嘅感受，免得佢地見到情侶放閃而傷心。

仲有「スパゲッティPiaPia」呢間Cafe都禁止情侶節日期間入店，唔洗識日文，就咁睇圖都知「情侶立入禁止」呀！

Photo from j-town.net

可能好多餐廳喺呢個節日都會推出好多「情侶甜蜜套餐」，但日本呢啲餐廳就反其道而行之。可能你會覺得佢地好傻豬豬，但其實除咗宣傳效果好好之外，仲大有市場！因為呢個世界仲有好多唔敢喺聖誕節出街嘅單身狗呀！！！

如果香港有呢啲餐廳，請話比你身邊嘅單身朋友知！佢地應該好開心！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）