超可愛插畫 唔講唔知8大國家慶祝聖誕千奇百趣習俗！日本人原來聖誕必食KFC？美國人聖誕樹掛醃黃瓜～

呢個由插畫家Marie Muravski畫嘅各國聖誕千奇百趣習俗，可愛咁呈現左好多國家唔同慶祝聖誕嘅方法！

1. 葡萄牙 - 留空櫈同死左嘅家人一齊食聖誕大餐
唔講唔知，葡萄牙食嘅聖誕大餐係係聖誕節正日嘅朝早！而佢地仲會為死左嘅屋企人留空位，等佢地嘅「靈魂」都可以參與一齊慶祝聖誕節！
Photo from Marie MuravskiPhoto from Marie Muravski

2. 義大利 - 著條花呢碌嘅底褲慶祝
好似中國人賭錢咁要著條紅「底橫」，義大利人想祈求係黎緊呢年嘅好運，就會係平安夜著條花花彩色底褲，仲要夠乾淨先得嫁！
Photo from Marie Muravski

3. 日本 - 要同情人一齊食KFC炸雞
日本人視聖誕節為情人節，有情人就一定會同情人去過！不過原來佢地唔係課金去食聖誕大餐～因為有「食炸雞取替食火雞」嘅觀念，佢地嘅聖誕大餐就係一齊去KFC食炸雞喇！仲要多人到要早啲打去預約嫁！
Photo from Marie Muravski

4. 美國 - 聖誕樹會掛醃黃瓜(?)
唔講唔知，原來美國內戰聖誕節個陣，一個被俘虜左嘅士兵怕自己會係餓死，就求人比啲野佢充饑，而當時個個人就係比左醃黃瓜佢！自始就變成一個美國聖誕嘅習俗喇！
Photo from Marie Muravski

5. 格陵蘭 - 聖誕節係老婆節！
原來係格陵蘭嘅聖誕節，係一個「老婆節」黎嫁！老公個日就要對住老婆任勞任怨，要滿足老婆嘅要求～
Photo from Marie Muravski

6. 白俄羅斯 - 公雞占卜
係白俄羅斯嘅聖誕，一班單身好恨嫁嘅女仔就會捉隻公雞做占卜。每個人都會係前面放一埋粟米，公雞食左邊個前面個埋粟米，個個女仔就會係黎緊呢年嫁出！
Photo from Marie Muravski

7. 菲律賓 - 食大大個紅色芝士波
係平安夜當晚，佢地會圍埋一齊食聖誕大餐，當中唔少得一個紅色嘅巨大芝士波！
Photo from Marie Muravski

8. 海地 - 拋稻草鞋引禮物
海地嘅小朋友用拋磚引玉呢個方法，將塞滿稻草嘅鞋放係聖誕樹下面，聖誕老人個晚就會將稻草拎走放入禮物！
Photo from Marie Muravski

仲有好多唔同國家過聖誕嘅方法！有興趣係呢度就睇下Marie Muravski嘅作品喇！小編祝大家聖誕快樂～～～～～

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）