日本銀山溫泉 入夜雪境超浪漫 古色古香溫泉街帶你返到江戶時代！

入冬天氣咁凍，正係浸溫泉嘅季節，日本山形縣嘅銀山溫泉雪境靚到好似電影場景咁，超級浪漫！

雖然可以即日來回，不過銀山溫泉最出名嘅就係入夜後嘅景色，所以強烈建議大家喺呢度嘅溫泉旅館住返晚！

銀山川清澈嘅河水穿流其中，兩邊有3、4層樓高木屋旅館排成一排，氣氛寧靜，就好似入咗日本古代電影嘅拍攝場地咁。

根據日本國家旅遊局，呢度因為500年前發現咗銀礦，所以取名為「銀山」，銀山溫泉泉質係硫酸鹽溫泉，帶有少少鹹味。據講對皮膚割傷、燒傷、慢性皮膚病、慢性婦科病、動脈硬化等有唔錯嘅療效。

銀山溫泉最出名嘅美景就係冬日大雪，地面上、屋頂上蓋上一層層白雪，配合古老嘅溫泉街，煤氣燈昏黃嘅光線映照著銀山川兩岸，夠晒夢幻。

而銀山川兩邊大正浪漫時期嘅溫泉旅館，同樣令人留連忘返。銀山溫泉依家已經係日本溫泉聖地之一，唔少人都想嚟呢個溫泉之鄉浸下溫泉。

溫泉大街雖然唔長，但具歷史感嘅建築令人忍唔住駐足欣賞，呢度嘅溫泉旅館大部分都係喺大正到昭和初期興建而成。三四層樓純日式傳統的木製建築，散發出濃濃的時代感。

當中最出名就係大正十年興建完成，獲日本政府納入指定文化財嘅「能登屋旅館」，據講仲係《千與千尋》入面油屋嘅原型！大家覺得似唔似？

而前往銀山溫泉嘅交通方面，日本國家旅遊局推薦乘坐JR山形新幹線從東京車站去到大石田車站（約3個鐘20分鐘），再搭巴士「銀山はながさ号」從大石田車站到銀山溫泉（約40分鐘）。

喺東京出發到大石車站屬於「JR東日本PASS」嘅使用範圍，票價6,480円，所以有買到Pass嘅話建議使用！

除咗溫泉之外，仲有其他景點可以參觀，大街前面有個白銀公園，入面有散步小道，浸完溫泉之後可以去下散步，而公園入口處更有一個落差22米嘅白銀瀑布，可以喺度影相。

另外銀山之前有銀礦，依家可以入內參觀，呢個銀礦叫「延澤銀礦坑」，行完全程大約需要30分鐘，可以喺度體驗下洞窟探險嘅樂趣。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）