古天樂成首位歌影視大滿貫藝人！憑《殺破狼》成三料影帝後 唱半首歌拎埋最喜愛男歌手！

唔經唔覺又過一年啦！相信暫時喺新一年最多人討論嘅話題，必定係《2018年度叱咤樂壇流行榜頒獎典禮》當中，古天樂憑半首歌奪「我最喜愛男歌手」大獎啦！除咗有大部分網民話古天樂拎獎一幕成為全場最好睇一幕之外，原來佢仲係首位奪得歌藝視大滿貫嘅藝人！今次真係厲害、厲害！

Photo from IG@kootinlok_louis

2019年：憑《（一個男人）一個女人和浴室》奪「我最喜愛男歌手」
今年叱咤樂壇流行榜頒獎典禮其中最驚喜一幕，可謂古天樂奪「我最喜愛男歌手」，而且仲親自現身上台拎獎，兼即席獻唱《男朋友》！講明唔會唱LIVE嘅佢都上台獻唱幾句，令歌迷有驚喜之餘，亦令台下一眾歌手非常興奮啊！

Photo from 2018年度叱咤樂壇流行榜頒獎典禮

古天樂曾於2000年至2004年間出過4張唱片，其中最為人熟悉嘅歌必定係Hit到而家都仲有人唱嘅《今期流行》啦！雖然近年古天樂多專注於電影界發展，但其實喺2016年「張國榮誕辰60周年」當中，古天樂都有開金口與古巨基翻唱《當年情》㗎！小編都相信古天樂真係好中意唱歌㗎！

Photo from IG@kootinlok_louis

2018年：憑《殺破狼．貪狼》首奪影帝
而喺電影圈方面，古天樂當然大受歡迎，而且獲一致肯定啦！從影25年嘅佢，終於第37屆香港電影金像獎當中，憑《殺破狼．貪狼》首奪「最佳男主角」啊！

Photo from IG@kootinlok_louis

而且古天樂仲憑《殺破狼．貪狼》一片，奪第12屆亞洲電影大會「最佳男主角」，以及電影導演會周年晚宴暨頒獎典禮中奪「最佳男主角」，成三料影帝啊！

Photo from IG@kootinlok_louis

古天樂從事電影業多年，除咗於幕前發展，仲成立電影公司以及電影後期製作公司，投資並支持本土電影，其中最為人熟悉嘅《以青春的名義》以及《五個小孩的校長》，古天樂都有份投資以支持一班新導演㗎！古天樂為電影界確實付出唔少！

Photo from IG@kootinlok_louis

1999年、2001年：憑《刑事偵緝檔案IV》及《尋秦記》兩度成視帝
古天樂喺投身電影圈前，喺TVB拍劇嘅成續都相當出色㗎！當年非常受歡迎嘅TVB台慶劇《尋秦記》，更令男主角古天樂於2001年《萬千星輝頒獎典禮》中勇奪「最佳男主角」啊！當年古天樂飾演嘅項少龍大受歡迎，可以話喺古天樂嘅全盛時期啊！

Photo from TVB劇照

其實喺《尋秦記》之前，古天樂已憑《刑事偵緝檔案IV》於1999年，首奪《萬千星輝頒獎典禮》「最佳男主角」一獎，而且更加係電視史上最年輕嘅視帝，當年古天樂都只係29歲，正式入行只得5年咋！

Photo from TVB劇照

如今拎埋「我最喜愛男歌手」嘅古天樂，雖然網民對今次由古天樂獲獎一事嘅評價好壞參半，但叱咤呢個獎亦令古天樂同時成為首位歌影視大滿貫藝人！真係雙喜滿門啊！

圖片來源：IG@kootinlok_louis、TVB劇照

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）