《我不是藥神》真事改編！小角色抵抗無良藥廠賣貴藥壟斷市場 為病友鋌而走險 劇情搞笑感人 睇完會對內地電影改觀

《我不是藥神》改編自真人真事，喺內地同台灣上映咗一段時間大受好評，創逾30億票房，而香港於2019年1月3日上映。睇完可能會令你對內地電影有所改觀。

《我不是藥神》開頭會有少少黑色幽默咁，慢慢發現之前鋪陳嘅故事線係要到後來爆發。

Photo from edko films

電影講述上海經營「印度神油」嘅老闆程勇同老婆離咗婚，仔仔間中可以同佢見面，但有日前妻話要帶埋仔仔同而家嘅老公移民，仲要遇著阿爸需要錢做手術，呢個時候遇到病友請佢到印度代購價錢低好多倍嘅藥返嚟仿製抗癌藥「格列寧」，但係內地呢隻仿製藥係禁藥，等同走私，幾經掙扎都係應承咗。

Photo from edko films

明明藥效一樣，但點解正版抗癌藥會貴咁多，一般病人屋企根本無法負擔得到，但又要等住啲藥救命，而仿製藥同正版藥效一樣，點解又會被禁？

Photo from edko films

Photo from edko films

而主角程勇一開始塑造出嚟嘅形象都係市井之徒，亦唔係好似一般主角「有慈悲心腸」想救大家先冒險，當初真係只為錢，需要錢應急，再因為錢先搵病友、病友家屬組隊幫忙。

Photo from edko films

但佢係確定仿製藥係同正版藥效相近，無副作用，以及無獅子開大口情況販賣仿製藥，賺錢同時亦無害人，唔似見佢賺到錢就學佢賣假藥嘅一班人，為賺錢不擇手段。

唔係完全無私心嘅正義，但有同理心，將佢塑造成幾真實、有血有肉嘅角色。

電影中鋪墊程勇同一齊賣藥嘅病友同家屬拍檔之間嘅友情，對佢地嚟講程勇係大哥，係佢地嘅英雄，因為程勇嘅出現令到佢地唔駛再為生存而買藥，繼而傾家蕩產。

Photo from edko films

所以當程勇係大家開開心心圍住係到為自己同屋企退縮，令佢地徹底失望。劇情將程勇同各個人關係描繪得好細膩，除咗神父幾乎每個人都同程勇有條故事線。

當中兩條故事性都影響程勇由一個為自己嘅市井之徒，變成一個真係無收利益、為病友冒險嘅「英雄」，但佢表面依然要扮係普通生意人，呢個過渡唔會突兀，而且情理之內。

Photo from edko films

除咗佢同拍檔之間嘅牽絆搞笑又令人動容，有幾幕都聽到身邊唔少觀眾抽出紙巾，因為前面鋪墊得好好，帶出佢地關係深厚，猶如無血緣嘅家人咁。

最令人動容嘅莫過於黃毛呢條故事線，由當初喺程勇手上搶走仿製藥，只為畀一眾好窮嘅病友一齊有藥食，開頭唔多甘願咁幫程勇，知道程勇為人有義氣後，為佢仆心仆命，到程勇唔想再賣藥，憤而離去。再後來因為程勇唔收利益咁為病友冒險，佢對程勇更加賣命。

Photo from edko films

後來其他買藥嘅病友、曾經威脅會爆佢賣藥嘅事出嚟嘅人，甚至以前睇佢唔起嘅前妻細佬，都感受到佢唔係為賺錢，只係為更多病友可以服用合理價錢嘅抗癌藥而冒險，無人為咗自己脫身而篤佢出嚟，當下會睇到好感動。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）