《大帥哥》張衛健劇中重演孫悟空!超懷念經典金句再現 齊天大聖返嚟啦!

《大帥哥》張衛健劇中重演孫悟空!超懷念經典金句再現 齊天大聖返嚟啦!

Life 本地生活HotTalk 熱門話題
By PressLogic on 08 Jan 2019

最近TVB一套《大帥哥》再掀起大家追劇熱潮,亦引嚟網民一番激烈討論,而最新一集《大帥哥》更有張衛健所飾演嘅狄奇重演孫悟空!今次真係「型到跌渣」!相信網民一聽到句經典金句都非常懷念啊!

TVB
Photo from TVB

「我係⋯⋯如來佛祖玉皇大帝觀音菩薩指定取西經特派使者花果山水濂洞美猴王齊天大聖孫悟空」!呢句金句相信無論係男女老幼都唔會陌生,而今次仲可以喺《大帥哥》當中,從張衛健口中再聽一次,真係令觀眾非常驚喜!

TVB
Photo from TVB

最新一集《大帥哥》講到,羅義帶狄奇逃獄後,羅義被李細龜捉到,而李細龜當然唔會放過羅義啦!當李細龜正諗到一槍解決羅義之時,馬炭趕及制止,而李細龜提議此事由兩兄弟自行解決,但揚言羅義今次「無命返出去」啊!

TVB
Photo from TVB

馬炭同羅義用槍互相指向對方,此時羅義特登「射歪」無打中馬炭,但馬炭則殺死咗羅義。狄奇眼見呢幕顯得非常激動,無諗過馬炭會殺死羅義,但由於要躲避李細龜等人追捕,不得不逃跑。

TVB
Photo from TVB

其後狄奇逃到一間正準備舉行粵劇嘅小店,但不久後就發現同時有軍閥到來收茶錢,軍閥因小店老闆無錢比而決定用「窩藏通緝犯」名義搜店。狄奇心知不妙,幸得小店老闆因非常討厭軍閥,決定幫助狄奇,帶狄奇到化妝間。

TVB
Photo from TVB

狄奇眼見粵劇成員正梳妝準備,而為避免軍閥發現,狄奇當然都梳妝打扮啦!粵劇開始後,狄奇便以孫悟空身分出場,喱個時候觀眾當然非常興奮,因為張衛健所飾演嘅孫悟空返嚟啦!

TVB
Photo from TVB

張衛健除咗仲為大家演釋咗幾個舊時孫悟空經典動作外,仲隨即就講出經典金句:「我係⋯⋯如來佛祖玉皇大帝觀音菩薩指定取西經特派使者花果山水濂洞美猴王齊天大聖孫悟空,型到跌渣!」,而剪接上仲喺講金句之時加上西遊記經典背景音樂,觀眾們啲回憶一次過返曬嚟啊!

TVB
Photo from TVB

呢集咁經典當然引嚟唔少人討論啦!有網民大讚張衛健「完全仲有當年嘅身手同風範」,就有網民話「聽到(西遊記)BGM就想喊」,今集真係命中唔少讀者嘅心同回憶啊!其實喺預告中已有張衛健飾演孫悟空一幕,但觀眾無諗過狄奇會喺因逃避軍閥,加上羅義死咗嘅回憶上演,所以都有唔少網民話睇到好心痛同好慘啊!

TVB
Photo from TVB

唔知狄奇之後又會點翻身,而劇情又會唔會再接再厲出現一幕幕經典呢?

圖片來源:TVB

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 holiday@presslogic.com比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic


Share to Facebook