《綠簿旅友》真人真事改編！黑人鋼琴家受盡白人同黑人白眼 仍努力掙扎尋找自我

以前喺美國對黑人嘅歧視非常嚴重，嚴重到有啲地區要區分白人同黑人嘅活動範圍，而《綠簿旅友》講嘅係一個黑人鋼琴家本來可以留係紐約，係環境高級、受人尊敬嘅地方彈奏，偏偏佢就揀要全美國巡遊表演，為嘅係尋找自我嘅定位，同時用自己嘅才華扭轉白人對黑人嘅想法。

Photo from Intercontinental Film

一開始就會睇到故事兩個主角定位同當時黑人、白人幾唔同，一個雖然係黑人，但佢有卓越同令人折服嘅鋼琴琴技，生活於當時紐約嘅中上階層；另一個雖然係白人，卻喺低下階層打滾同生存。

一開頭歌廳保安Tony因歌廳暫停營業而短期內無嘢做，本來對有色人種戴有色眼鏡，為咗生活而勉為其難成為黑人鋼琴家Don美國巡演嘅司機，但路途中對Don嘅鋼琴技術同做人嘅堅持而對黑人有所改觀。

Photo from Intercontinental Film

睇之前會以為係一套幾嚴肅嘅電影，探討當時歧視問題，但其實劇情一半都係輕鬆搞笑、感人，同埋會對呢兩個角色改觀。因為一開頭Tony就好古惑仔咁，唔會對佢有咩好感；而Don都好似一個高高在上嘅有錢人咁。

但佢地喺旅途中，Tony引導Don點樣不受禮儀規範咁享受生活，並且因為Don嘅鋼琴技術而感動，為佢嘅堅持同原則而佩服；而Don教Tony係適當時候要忍耐，到適當時候為自己抵抗。

Photo from Intercontinental Film

會覺得將兩個好唔同嘅人拉埋一齊，然後互相影響。好似Tony以前會無理由咁歧視有色人種，但到佢真係喺Don身邊，發現好多時明明無做錯，但其他人就先入為主用盡惡劣態度對待Don。

最可悲嘅係因為Don係受高等教育嘅鋼琴家，喺黑人社會又顯得格格不入，同時又會覺得佢係異類，令到佢變成兩邊都無立足嘅地方。

但Don有樣嘢令Tony同觀眾都會大為折服，就係明明佢可以喺紐約繼續受人尊敬，得到應有嘅尊重咁演奏，但佢選擇全國巡演，走過嚴重歧視嘅地區，因為佢要用自己嘅琴技去改變眾人對黑人嘅睇法。

Photo from Intercontinental Film

Tony有講過都唔知Don點忍受啲人當佢係次等人，廁所都唔畀同白人用同一個，要出花園嘅廁所，然後Don仲可以若無其事咁同呢啲人打交道，其實Don好清楚佢嘅態度就會影響其他人點睇黑人，然而如果想扭轉一般人對佢地嘅睇法，就唔可以輕易畀呢種對待被激怒，因為對事情並無幫助。

但唔代表無論點畀人對待都死忍，越過底線就要企出嚟反抗，呢樣係Tony教識佢。

同埋Don教Tony寫情信畀老婆，同樣令人印象深刻，都睇住Tony同Don慢慢變成感情深厚嘅好朋友，到最後就算由Tony自己寫出嘅情信，都已經唔需要Don再修改啲咩。

Photo from Intercontinental Film

呢套唔係一套說教嘅故事，反而係溫暖而且幾真實嘅電影，睇住Don睇落好有自信，堅持原則，過著優渥嘅生活，而其實佢都係喺社會夾縫間尋找自我、容身之所。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）