0罪疚素菜韓國菜放題?! 星期一全日同價1.5小時素菜放題～超像真素菜豬肉登場！流心素芝士～

呢間以健康韓國菜做主打嘅餐廳，最近推出逢星期一全日同價素菜放題！

即使係晚市都只係$198，可以係1.5小時內無限食素菜放題menu嘅任何菜式！不過只限星期一啊！

佢地更加引入最新嘅全植物超像真未來豬肉Omnipork加入陣容！唔講唔知，入面其實只係用左豌豆、非基改大豆、冬菇同米嫁咋～健康在於佢真係不含膽固醇，任何抗生素或激素～

板燒未來豬肉漢堡扒生菜包
呢款係純素黎嫁～食落好似食緊真嘅肉咁～連同鐵板一齊奉上，係鐵板上面烤一烤佢令佢每一面都可以整到焦香！熱辣辣包住生菜食真係好味又零罪疚感啊～

焗芝士蕃茄未來豬肉丸子
同樣用上未來豬肉，今次以肉碎形式釀入豆卜～整成巨大未來豬肉丸子，同埋蕃茄醬、daiya素車打芝士同、素Mozzarella一齊烤焗～變成一個全素又不乏惹味嘅菜式！

素豬肉泡菜炒飯
無錯啊！韓國菜真係可以係素菜黎嫁，仲可以炒得好香口！

炸素魚腐
用左百頁豆腐去整，外皮酥脆入面軟滑彈牙～值得一提係建議同埋韓國芝麻葉一齊食嫁！

素泡菜芝士薯條
佢地係用自家醃製泡菜！誠意滿分，同樣加入素芝士去焗，原來素芝士都可以拉芝嫁！

除左以上幾款新菜式，仲有呢啲都係人氣之選黎嫁～
黑糖麻藥粟米
粟米裹上黑糖醬，再加上麻藥～食落香甜超滋味！

原味煎餅
除左羽衣甘藍煎餅之外，呢款可以揀加入洋蔥、蘑菇等等～食落外皮香脆帶微微煙韌，點埋個秘製韓式醬！真係好yummy啊！

Menu仲有好多款素菜可以揀嫁～

如果想加飲品放題，可以+$38有普通類別！如果想飲特飲嘅話+$88就可以任飲喇，當中仲會包埋一款素甜品！
係奇異籽素奶凍黎嫁，可以揀：韓蔘蜂蜜、士多啤梨、芝麻口味！

想食個零罪疚感嘅韓式放題，記得約埋朋友去喇！
Photo from Presslogic

The Joomak
地址：尖沙咀廣東道17號海港城海運大廈3樓LCX 34號舖
查詢：2111 0851

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）