慈善單車之旅遇意外！麥明詩炒車受傷 仍鍥而不捨繼續跟隊友上路！

麥明詩同無綫娛樂新聞主播潘梓鋒以及兩個朋友參加為期27日由香港踩單車去柬埔寨嘅慈善籌款活動，全程要踩2500公里，途經中國、越南、老撾、泰國同柬埔寨五個國家，為慈善出力。

而行程到咗第9日，麥明詩卻不幸受傷！麥明詩喺廣西合蒲踩單車去欽州市期間，想拉開同拍攝車距離，但喺斜路失去重心，左邊身落地受傷，擦傷咗膊頭、盆骨同手踭。

Photo from tvb

佢即刻入醫院做檢查同醫治，睇片佢落車似乎都有啲吃力，而且需要輪椅輔助，麥明詩表示：「其實擦傷都算還好，但盆骨左邊個位好痛，一郁到隻腳或者郁到個身，呢一度組織就好痛，唔係好行到路，所以為安全起見，check下究竟傷到肌肉定骨頭，定係其他組織。咁我依家精神ok嘅，係擔心緊唔知幾時恢復到踩單車。」

Photo from 麥明詩 IG

Photo from 麥明詩 IG

Photo from 麥明詩 IG

Photo from 麥明詩 IG

好彩麥明詩只係拉傷肌肉，無骨折，總算不幸中之大幸，嚟緊7日都要休息，唔可以踩單車住。麥明詩就話:「我諗依家係肌肉拉傷，因為頭先跌落嚟衝力好大，行唔到路，我擔心嚟緊幾日要靠幾位隊友做我人肉拐杖。」

Photo from 麥明詩 IG

本來呢個慈善籌款活動仲有19日行程，原定喺聽日會完成中國路段，22號進入越南，依家其他隊友會繼續行程先，而麥明詩會隨隊，等到好返就會繼續踩單車。

Photo from 麥明詩 IG

睇返麥明詩ig，佢雖然受傷到行動不便，要靠隊友做人肉拐杖。不過佢仍然堅持帶傷繼續行程，為慈善做到底！

Photo from 麥明詩 IG

佢亦喺 ig報平安：「【踩單車去柬埔寨】Day 9今早下坡前輪碰到車輛導致炒車，以高速落地，幸好冇骨折！可惜衝擊導致盆骨左側和下背軟組織受創，肌肉拉傷，暫時行動不便，要至少休息幾天，感謝大家支持和鼓勵！多謝Bryan第一時間掟低佢自己架車喺馬路執番我去到路邊，同埋幫我搵咗支拐杖番黎，感謝幕後團隊同埋Laurence即刻first aid，Danny安排到醫院檢查。辛苦大家了，耽誤大家了！」

受咗傷都要堅持行程，真係少啲毅力都唔得啊！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）