愛回家獲允許「添食」望破最長命處境劇《真情》劉愷威或會「重出江湖」！

By Ivory on 25 Jan 2019

Digital Editor

TVB處境劇《愛．回家之開心速遞》日前喺TVB電視城舉行慶功宴，劇中大部分嘅主要演員包括劉丹（熊樹根）、呂慧儀（熊若水）、滕麗名（熊尚善）、林淑敏（龍力蓮-大小姐）、許家傑（宋瑞輝-送水輝）、單立文（熊樹仁）、李偉建（Terry）、歐瑞偉（KC）等都有出席，場面墟冚！

Photo from 愛回家之開心速遞

《愛回家》喺2018年11月27日嗰集嘅7天跨平台總收視有29.9點，成為上年《愛回家》單集最高收視，而踏入2019年第一日嗰集，佢嘅7天跨平台總收視更高達30.5點，即係有差唔多2百萬人收睇。

Photo from 愛回家之開心速遞

無論戲裏戲外都咁德高望重，飾演熊樹根嘅劉丹喺慶功宴上發言表示，拍《愛回家》舒服又開心，梗係希望長拍長有，一直拍落去，「《真情》嘅集數總共播咗1128集，所以《開心速遞》嘅目標應該係1129集，最好梗係1129集之後都繼續播啦！不過都要珍姐（曾勵珍）點頭。」似乎誓要取代《真情》，榮登「最長命處境劇」。

Photo from 《真情》

丹爺講完呢番話之後，珍姐就點晒頭，表示欣賞台前幕後嘅齊心，相信觀眾都有眼睇，仲話：「要邁向《真情》1128集，我唔覺得有咩難度。」

《開心速遞》琴日就播到第501集，高層喺慶功宴上亦同時宣布添食，暫時將會拍到720集。換句話說，《愛回家之開心速遞》會加拍約200集。滕麗名向傳媒透露，佢收到通知最少會拍到12月，呂慧儀就高呼希望拍到2020年。

Photo from 《愛回家之開心速遞》

丹爺接受傳媒訪問嘅時候透露，啊仔劉愷威本身都想嚟晚宴，但冇份拍，冇得去！有傳媒就問，會唔會叫佢番嚟客串下，丹爺就咁答：「唔知佢得唔得閒，等我返去問吓佢有冇興趣。」

Photo from 微博@劉愷威

啊爸開到聲，啊仔劉愷威冇理由唔應承啩～

愛回家之開心速遞自開播以嚟，觀眾嘅評價好高，造就多對CP，例如大小姐送水輝、KC Terry、安仔 Bonnie、池子孝熊心如、秦博士 Mandy等，又會「聽民意」，真係編咗「池美麗做飯腳妹」一集，更有網民話晚晚都睇《愛回家之開心速遞》，仲話「呢套劇真係可以幫人減壓香港而家太多人精神緊張食飯時候笑一下」。