《阿凡達》製作班底!《銃夢:戰鬥天使》合成人Alita比人類更有人性  更有正義感  打鬥場面唔會令觀眾失望

《阿凡達》製作班底!《銃夢:戰鬥天使》合成人Alita比人類更有人性 更有正義感 打鬥場面唔會令觀眾失望

Hong Kong 香港食玩Life 本地生活Movie 電影HotTalk 熱門話題
By Presslogic on 04 Feb 2019

《銃夢:戰鬥天使》改編自日本科幻漫畫,由《阿凡達》《鐵達尼號》導演占士金馬倫打造嘅奇幻冒險故事。未睇過原作,但當入場睇嘅時候比想像中帶驚喜。

foxfilmhk
Photo from foxfilmhk

故事講述幾個世紀後嘅未來世界﹐而合成人Alita喺廢墟畀醫生伊度發現,仲幫佢連接由佢製造嘅身體,給予佢一個新人生,不過Alita已經唔記得晒以前嘅事,對身邊一切事物都好新奇,而且好想搵返以前嘅記憶。

foxfilmhk
Photo from foxfilmhk

但佢發現伊度似乎知道佢嘅身世,但向佢隱瞞,而Alita好朋友Hugo就努力幫佢搵返記憶。當愈接近Alita以嘅過去,危險就愈嚟愈接近佢地。

睇完覺得幾明白點解叫佢做「戰鬥天使」,因為佢有天使咁樣純潔單純嘅容貌同性格,但同時擁有極高戰鬥力,面對比自己身型大幾倍嘅對手,都毫無懼色,仲一下下化解攻勢。

foxfilmhk
Photo from foxfilmhk

不得不提就係電影嘅打鬥情節真係拳拳到肉咁,而且帶少少血腥,幾營造到地面城市好似龍蛇混雜、唔多太平嘅感覺。

而Alita呢個角色刻意保留漫畫中大眼睛嘅設定,仲大到有異於一般人,帶出角色本來嘅純真、正義感,同埋佢唔係純正人類嘅身份,單睇外表就知道佢係合成人咁。雖然用CG塑造佢嘅外表,但電影中佢嘅表情變化細膩。

foxfilmhk
Photo from foxfilmhk

雖然Alita性格設定係好有正義感同單純,仲會好願意為佢在乎嘅人付出,但都可以睇到佢對醫生伊度有少少反叛情緒,真係幾似一個十幾歲嘅少女,對住爸爸個種感覺。

有時候仲會覺得佢幾幼稚同衝動,令到自己同身邊嘅人都陷入危險。不過可能係想因而引出醫生終於同意Alita想打擊罪惡,願意話佢聽佢嘅過去。

foxfilmhk
Photo from foxfilmhk

但到後來愈接近佢嘅身世,發現佢背負嘅責任愈大,愈係令身邊嘅人身陷險境,令到佢愈變成熟,同埋眼神都有所唔同。

foxfilmhk
Photo from foxfilmhk

而故事都帶出少少社會問題,就係好似地面嘅人都係為天空之城薩林嘅人工作,地面嘅人都會奢望終有一日可以上呢個天空之城,而唔少人就係利用佢地呢種想法,呃佢地幫手做一啲黑暗嘢。

有少少似為咗利用想出人頭地嘅人,要佢地不擇手段做黑暗嘢,而唔整污糟自己對手咁。無論動作定畫面,《銃夢:戰鬥天使》都幾出色。

foxfilmhk
Photo from foxfilmhk

不過覺得入面嘅感情線好似有少少突兀,好似刻意要用呢件事突顯Alita面對愛情嘅毫不保留,以及從中嘅成長。

《銃夢:戰鬥天使》2月5日上映。

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編

Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 holiday@presslogic.com比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic


Share to Facebook