梁漢文、方力申做鄭中基演唱會表演嘉賓《美女廚房》再現!

By Ivory on 08 Feb 2019

Digital Editor

鄭中基《One More Time世界巡迴演唱會》由年三十晚唱到年初五，一共開4場！年三十晚嗰場佢就同大家倒數大年初一，兼有死黨杜汶澤做嘉賓，大放笑彈，仲畀機會杜汶澤幫佢老婆大sell唱片！期間佢大唱經典金曲，包括《我代你哭》、《時間人物地點》，粉絲們大飽耳福！

Photo from IG@alexfongliksun

而喺年初二，鄭中基搵嚟《美女廚房》最佳拍檔梁漢文同方力申。三子難得同台，當然唔少得大騷搞笑本色！佢哋提起12年前一齊主持嘅《美女廚房》，鄭中基話：「大大話話大家有十年冇睇過《美女廚房》。」台下觀眾就大嗌話唔係～梁漢文亦都出聲指正佢：「你都癲癲哋嘅，最近有做咖！」方力申隨即用經典金句回敬梁漢文：「嗰個假咖！」引嚟台下一片大笑聲！

Photo from IG@alexfongliksun

鄭中基笑問歌迷想唔想再睇佢哋做嘅節目，仲建議做個新節目叫《美男廚房》，小方「激動」話佢哋兩個「變晒」，鄭中基就話：「我哋都有家室，唔好亂食嘢喇！」小方聽到即刻扮嬲，仲抵死拎自己嘅感情狀況開玩笑：「你哋都上晒岸，『升』晒呢，我呢？我就『Single（單身）』想當年我唔係Single嘅時候就安分守己，今日我Single啦，就食自己！」聽到嗰下，個心都戚戚然啊，即刻諗起佢同Stephy（鄧麗欣）嘅戀情～

Photo from IG@edmond4gorleung

三子話新節目「有得搞」，小方仲話會返TVB傾傾，鄭中基笑話：「唔一定要TVB，依家有ViuTV！」梁炳出出新主意話：「我哋有大志啲，搞個台出嚟，到時司儀、十大金曲、女歌手都係我哋，神又係我哋、鬼又係我哋呀！」一向轉數快嘅鄭中基抵死話：「名我都諗埋喇，叫TViuB！」

完咗嗰晚演唱會之後，《美女廚房》三子都Post咗相上IG。鄭中基好多謝方力申縮短返北京探親嘅旅程，亦好開心三子終於夾啱時間一聚，仲公開表示話佢哋兩個都係以前出生入死嘅好兄弟！而梁漢文就搞笑話：「原來對上一次三個一齊做嘢已經係10年前」，仲話想搞啲嘢添～（搞個節目出嚟啊！）方力申就用咗個感性Mode，感謝粉絲們對佢哋三子嘅支持。

在 Instagram 查看這則貼文

特別多謝小方，要縮短咗每年返北京探親嘅行程趕返嚟幫我做嘉賓。另外多謝Edmond TViuB嘅idea，我哋會返去積極度吓點搞個台㗎啦，你哋要密切留意吓。好難先夾到呢一晚嘅期，好多年冇三個聚埋一齊。見返以前出生入死嘅兄弟真係好開心。 #原先真係諗住即場美女廚房 #但比導演即場秒收皮 #原因我諗大家都估到 #OneMoreTime

Tiny Eyes（@tinyeyes39）分享的貼文於 PST 2019 年 2月月 7 日上午 5:14 張貼

在 Instagram 查看這則貼文

原來對上一次三個一齊做嘢已經10年前?今晚大家熱烈嘅反應搞到我哋又想搞D嘢添....

梁漢文 Edmond Leung（@edmond4gorleung）分享的貼文於 PST 2019 年 2月月 6 日上午 9:33 張貼

在 Instagram 查看這則貼文

Thank you @kaytse ! Your song is powerful!!! Super fun tonight! I miss my bros @tinyeyes39 @edmond4gorleung ! The good old days!!! Great performance Ronald！ #itsawonderfonglife

Alex Fong Lik Sun（@alexfongliksun）分享的貼文於 PST 2019 年 2月月 6 日上午 10:30 張貼

在 Instagram 查看這則貼文

超過10年沒有再同台表演，但沒想到觀眾仍然這麼喜歡我們仨。感謝大家！#美女廚房 #itsawonderfonglife photo by @locatherine112

Alex Fong Lik Sun（@alexfongliksun）分享的貼文於 PST 2019 年 2月月 6 日下午 10:58 張貼