譚仔三哥推出爆笑情人節套餐！10小辣朱古力+溫馨過橋米線

情人節想同另一半慶祝但又唔想「荷包乾硬化」？如果另一半「抵得諗」嘅話，食「譚仔」會唔會係一個選擇呢？唔係講笑！譚仔三哥米線將喺情人節推出情人節限定套餐，浪唔浪漫見仁見智，不過就創意爆燈！

譚仔三哥米線日前喺Facebook貼文，表示2月14日情人節下午3點後，將推出「最貼地」情人節套餐，包括「溫馨過橋米線」、「浪漫土匪雞翼」，同埋「辣之戀人」10小辣朱古力。真係夠晒搞笑！

Photo from 譚仔三哥米線@FB

Photo from 譚仔三哥米線@FB

不過情人節食飯環境都好重要！官方就貼埋圖話有分店仲設「海景位」，唔去高級餐廳都一樣咁有「情調」咁話！

Photo from 譚仔三哥米線@FB

貼文一出，唔少網友都紛紛發表抵死留言：「有冇人拉小提琴？」、「朱古力有無得揀大辣？」等，仲話可以測試另一半對自己嘅愛。

Photo from 譚仔三哥米線@FB

不過單身網民就表示估唔到情人節連譚仔都「失守」，真係叫一眾「單身狗」到時唔知去得邊度食飯好啦！

資料來源：譚仔三哥米線@Facebook

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）