木材與水泥牆設計京都具質感旅舍推介！由日本藝術家打理與各藝術家開設藝術展覽！

Digital Editor

去旅行散心當然想食好住好，到日本旅行而又喜歡文化藝術、文青、美學嘅朋友，住嘅地方除咗要舒服之餘，環境設計當然亦要非常講究啦！入住一間環境優美嘅地方可以打卡呃like之外，絕對係連心情都靚啲啊！而計劃去京都旅行嘅朋友有福了！小編為大家介紹以下呢間極具質感嘅旅舍，必定會令大家心動！

Photo from Kyoto Art Hostel Kumagusuku

呢間旅館名為「Kyoto Art Hostel Kumagusuku」，顧名思義係一間結合藝術設計於其中嘅旅舍，係由出生於大阪嘅年輕藝術家「矢津吉隆」，於2015年將原本老舊屋改建為呢間藝廊型旅館，非常適合熱愛藝術文化嘅朋友入住。

Photo from Kyoto Art Hostel Kumagusuku

旅舍大門以水泥牆作設計，外觀感覺低調，卻極具質感又不失優雅，比較似一家選物精品店多於旅舍。而入面則多以木板、木材傢俬裝飾，每樣傢俬擺設都可以睇得出老闆嘅悉心設計，整體感覺非常舒服！

Photo from Kyoto Art Hostel Kumagusuku

旅客對旅舍最關心嘅當然係房間啦！呢間旅舍嘅部分房間以木質作主要設計材質，而部分則保留咗日本古典氣派，感覺簡約但藝術感相當重，連傢俬嘅擺放都別具心思，好似進入咗一個藝術展咁啊！

Photo from Kyoto Art Hostel Kumagusuku

而旅舍最特別之處係會經常舉辦藝術展覽，圍繞房間附近有唔少展覽空間，老闆會邀請唔同藝術工作者以空間共享模式，在地進行創作，拉近藝術與大眾嘅距離，因此旅館充滿藝術氣氛，住客閒時亦可以欣賞展覽出嚟嘅藝術品。

Photo from Kyoto Art Hostel Kumagusuku

藝術型嘅旅館當然唔少得咖啡廳，咖啡廳於櫃檯旁邊，而且當中有售即磨咖啡，咖啡廳所有嘅餐具都非常精美，旅舍當中嘅每樣物件都猶如藝術品，亦放置咗唔到類型嘅藝術、文學書籍供住客邊嘆咖啡邊閱讀，喺旅館當中已經可以感受到日本人對美學同生活嘅追求啊！

Photo from Kyoto Art Hostel Kumagusuku

旅館分別有4個房型，大多數都只能予1-3人入住，所以並唔適合大班朋友入住，不過情侶去京都旅行嘅話，呢間旅館絕對係一個好選擇！

Photo from Kyoto Art Hostel Kumagusuku

「Kyoto Art Hostel Kumagusuku」位於京都四条大宮附近，乘搭京都巴士嘅朋友可於みぶ（壬生）操車場落車，步行一分鐘左右再右轉入小巷當中，就可以見到旅舍大門㗎啦！

Photo from Kyoto Art Hostel Kumagusuku

而另一優點係旅館嘅入住費係固定嘅，唔同房型及入住人數都會有唔同價錢，但價錢並唔會受旺季或淡季影響，而且價錢屬中等價位，每人約6,500円至8,500円一晚(約港幣455-600元)，大家可以去官網參考唔同房間嘅入住價錢再決定！

Photo from Kyoto Art Hostel Kumagusuku

各位中意美學、藝術嘅朋友，有機會去京都絕對要入住一次啊！

Kyoto Art Hostel Kumagusuku
地址：京都市中京区壬生馬場町37-3
電話：+81 75-432-8168
官網：https://kumagusuku.info/

Photo from Kyoto Art Hostel Kumagusuku

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel

木材與水泥牆設計 京都具質感旅舍推介！由日本藝術家打理 與各藝術家開設藝術展覽！