日本最高透明度湖泊 獲選為北海道遺産 傳說：只要見到仙霧彌漫嘅湖面 愛情就會長久

日本美景眾多，而北海道嘅壯觀嘅大自然景色正正係呢個地方嘅魅力所在，著名旅遊指南《米芝蓮綠色指南．日本》就推薦咗一啲日本靚景。

位於北海道嘅摩周湖喺呢本指南獲得3星，北海道本身有唔少湖泊，而摩周湖最為著名，全因為佢嘅清澈透明。

摩周湖水深211米，湖水曾經喺1931年驗測出透明度達到41.6米，係當時世界上透明度最高嘅湖。摩周湖湖水透明到幾乎無任何雜質，因為高透明度嘅原因，湖水折射出清澈嘅藍色，故稱為「摩周藍寶石」，而摩周湖常年有雲霧籠罩，好似處身神秘仙境咁，所以又稱「霧之摩周湖」。

Photo from shutterstock

Photo from shutterstock

2001年摩周湖獲選為北海道遺産，佢四周並無任何河流滙入或者滙出，而無論無晴天定雨天摩周湖嘅水位都維持喺同一水平，湖面平靜如鏡，非常神秘，難怪吸引到眾多遊客到訪一探究竟。

由於常年有「仙霧」環繞，所以摩周湖都有好多傳說，例如：「到訪摩周湖時，如果遇到起霧而睇唔清湖面，情侶嘅愛情就會長長久久」；「未婚者如果睇到晴朗嘅湖面，婚期會延遲5年」等，真係信不信由你喇～

Photo from shutterstock

摩周湖附近一共有三個展望台，其中第一展望台最方便，唔單止有收費停車場，更有大型購物商場、廁所等設施，商場入面仲有得買北海道特色美食同紀念品添！

Photo from shutterstock

第三展望台位於湖嘅西邊。另外仲有一個「裏摩周展望台」，3個展望台睇到嘅風景各有不同㗎！

Photo from shutterstock

Photo from shutterstock

摩周湖每年最佳觀賞季節係6月至10月，不過唔同季節亦有唔同風景。

Photo from shutterstock

交通方面，由7月中旬至10月初，會有巴士往來摩週湖觀景台同弟子屈町嘅JR摩周站，車程約20分鐘（途中經JR川湯溫泉站、硫黄山、川湯溫泉鎮），巴士自由票售價1800円；4月下旬至7月中旬，巴士會運行JR摩周站同一號展望台，車程約20分鐘，票價售540円

*其他月份不設巴士服務

有關巴士路線等資料可到阿寒巴士官網查詢。

地址：北海道川上郡弟子屈町摩周原野

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）