《仁妻》才女為家庭為愛情 將寫作才華冠上丈夫姓名 女主角毫無疑問成奧斯卡影后大熱

一睇《仁妻》嘅簡介就會好自然諗起差唔多時間上映嘅《寫我華麗緣》，同樣係講述妻子擁有寫作才華，但礙於時代對女性嘅才能抱有好大嘅疑問，從而成為丈夫嘅影子寫手，但兩者表達出嚟嘅女主角卻大有不同。

故事改編自同名小說，講述知名作家祖同妻子鍾結婚40幾年，係文壇模範夫妻，當祖得到諾貝爾文學獎，鍾睇住祖接受因為作品而獲得嘅榮譽，開始有種迷茫，因為一直以嚟得到好評同人氣嘅作品，名義上係祖寫，但實際係出自鍾手筆，就算祖喺台上感謝佢，鍾都無法得到半點快樂，相反得到嘅係諷刺咁。

Photo from EDKO FILMS

電影嘅預告宣傳標語都好點題同令人印象深刻——「以我的文字冠上你的姓名」

開頭會以為係另一套女權嘅電影，雖然係有輕輕帶過早年對女性才華嘅唔公平，未睇先評，但唔係電影入面嘅重心，更多嘅係探討鍾同祖呢兩個角色，同埋真實。

Photo from EDKO FILMS

鍾係讀書嘅時候已經展現佢寫作嘅才華，但有一個女前輩話佢聽，就算女仔寫作寫得幾叻都好，只會刊登喺校刊上面；而佢喺出版社做斟茶遞水嘅工作，亦親眼睇到出版社嘅人對女性寫嘅作品未睇已經有偏見，深知就算寫出幾好嘅作品，都唔會有機會畀到大眾睇到。

Photo from EDKO FILMS

相反，祖想寫出好睇嘅故事，但點樣都寫唔出。一個明明有才華，但作品無咩機會可以面世；一個可以令世人睇到作品，偏偏就無引人入勝嘅寫作才華。

Photo from EDKO FILMS

所以二人決定由鍾成為祖嘅影子寫手，但佢地兩個係咪真正得到開心？又唔係，好似祖咁會一直覺得係因為鍾嘅才華先得到榮譽同掌聲，喺鍾面前點都會有一份唔會談及嘅自卑。

Photo from EDKO FILMS

好多人睇嘅時候會覺得祖嘅角色性格惡劣，鍾對佢咁好，為咗佢奉獻才華，成為陰影下嘅一大助力，但佢仲會拈花惹草。

就佢而言，就算佢想幾努力都無用，佢只可以做一個傀儡，一個掛名嘅著名作家，所以連角色都唔了解，問到一個角色名仲問係邊個嚟。佢想要表現自己都無咁嘅機會，因為心知寫作能力絕對在於鍾之下，長期處於一種自卑嘅狀態。

Photo from EDKO FILMS

為咗下意識唔想畀人知係鍾寫嘅作品，就算同其他諾貝爾得獎者介紹鍾，都會講咗佢唔識寫作。但對於鍾嚟講，呢個係個莫大嘅屈辱。

鍾睇住自己嘅作品得到近乎最高榮譽，但上面寫住嘅卻唔係佢嘅名，除咗丈夫之外就無人知道係佢寫出呢堆作品。就算丈夫上台衷心感謝，喺佢耳中聽到嘅都係格外刺耳嘅說話。

Photo from EDKO FILMS

女主角Glenn Close喺電影嘅演技發揮好大，會睇到小鳥依人嘅佢，老公有咩古怪，佢都看在眼內。為咗家庭，佢要忍住自尊，做丈夫背後嘅女人，為佢嘅前途鋪上光明嘅路，卻無人知道佢嘅努力。

Photo from EDKO FILMS

當慶祝祖奪獎嘅宴會上，席上有位賓客問佢老公就寫書，咁佢做啲咩，觀眾都會睇到Glenn Close一瞬即逝嘅不忿，但佢皮笑肉不笑咁答咗一句：I am a king maker.呢到已經睇到佢嘅演技。

Photo from EDKO FILMS

演出妻子呢個角色顧及大局唔同嘅細節，但佢並非完全心甘情願，甚至唔少細節睇到佢對丈夫奪獎嘅迷茫、掙扎同若有所失，無辦法發自內心咁為佢高興。

Photo from EDKO FILMS

到最後Glenn Close演嘅鍾喺飛機同傳記作家講嘅一句話，更加令觀眾感受到個份霸氣氣勢，然後佢轉身同阿仔對話，又係另一個態度同感覺，會令人覺得佢真係演活呢個角色，而且演技收放自如，難怪能夠成為奧斯卡影后大熱。

Photo from EDKO FILMS

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）