首參戰奧斯卡嘅Netflix電影《羅馬》 出師有名連奪3獎 創電影歷史！

《羅馬》係電影史上首部喺串流平台Netflix上映嘅電影入圍奧斯卡，並有10個提名之多，係多部入圍電影中提名最多嘅電影。《黑豹》都只係緊隨其後！

Photo from 《Roma》

以佢第一次入圍奧斯卡嚟講，絕對係出師有名，連奪2個大獎，喺奧斯卡頒獎禮中一共囊括3個獎項，分別係「最佳外語電影」、「最佳導演」，以及「最佳攝影」。早前喺3個大型頒獎典禮上獲得最高殊榮嘅金獅獎，以及最佳外語片同最佳導演等獎項，更被坊間視為今次奧斯卡嘅大熱！

Photo from TVB

《羅馬》係第一部獲得最佳外語片獎項嘅墨西哥電影，亦係Netflix第一部入圍最佳攝影嘅電影，係Netflix進軍影壇嘅里程碑。同時，墨西哥攝影師兼導演艾方素柯朗（Alfonso Cuarón）亦憑呢部電影第二次奪得最佳導演嘅殊榮。佢曾憑住《地心吸力》喺2014年成為史上首位拉美洲裔導演。艾方素柯朗更曾執導《哈利波特·阿茲卡班的逃犯》，作品廣受觀眾歡迎！

Photo from 《哈利波特·啊茲卡班的逃犯》

呢部電影主要描述70年代中產階級墨西哥家庭生命中嘅一年，原住民女僕克麗歐悉心服侍白人僱主，將佢嘅子女視如己出，一切看似恬淡靜好。點知，當男主人拋家棄子後，女主人情緒崩潰，外界一連串天災人禍接踵而嚟，克麗歐嘅私生活亦遭逢劇變，原本主僕階級嘅隔膜，喺苦難中轉化成家人般嘅依賴情感。

Photo from 《Roma》

Netflix嘅營運模式不受業界認同，因為一般先喺戲院上映，隔90日先可以以其他方式發行，而Netflix主張畀用戶喺屋企睇電影，甚至開始製作原創電影，打破傳統，冇遵守傳統業界慣例，因而被拒之影壇外，更難以進軍大大小小嘅頒獎禮，變相抹殺所有Netflix製作人嘅功勞！

Photo from Netflix

今次入圍奧斯卡係吐氣揚眉，甚至喺奧斯卡頒獎禮上分「3杯羹」，代表傳統業界係時候要接受Netflix呢種營運模式。

近年越嚟越多人睇Netflix，佢嘅原創劇集同電影唔會遜色過一般嘅大電影，希望大家可以欣賞Netflix 上嘅作品，唔好埋沒咁多位製作人嘅努力！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）