麥當勞分階段推新產品 全新出前一丁黑蒜油豬骨湯味調味粉 經典菠蘿批滋味回歸！

由後日（2月27日-星期三）起，麥當勞將限定推出「宮崎風味南蠻炸雞漢堡」同「名古屋風味味噌吉列豬扒漢堡」。全新「宮崎風味南蠻炸雞漢堡」喺芝麻麵包入面加咗沾滿酸甜南蠻醬嘅炸雞塊，配埋蛋沙律、洋蔥條同椰菜絲，聽落覺得幾正！另外，推出「名古屋風味味噌吉列豬扒漢堡」，以名古屋味噌豬扒做靈感，選用外層酥脆，吉列豬扒配搭味噌醬，再配埋爽脆嘅椰菜絲同清新嘅檸檬白汁醬，揉合成獨特口味！

Photo from Mcdonald

伴隨住呢兩款漢堡登場嘅，仲有首次聯乘出前一丁推出嘅全新「出前一丁黑蒜油豬骨湯味調味粉」，加上全新「白提子椰果梳打」，諗起都流晒口水！

Photo from Mcdonald

Photo from Mcdonald

除咗以上兩種新產品外，全新「金澤風味黑咖哩吉列豬扒漢堡」亦由3月21日起登場，以鬆軟穀物麵包配搭香脆吉列豬扒，伴以香濃秘製金澤風味黑咖哩醬，加入淡淡白芝士、仲有檸檬白汁醬同爽脆椰菜絲添～全新「出前一丁麻油味調味粉」亦會同步推出，再加上全新「富士蘋果特飲」，以富士蘋果梳打同粒粒雜果調配而成，感覺好清新！

Photo from Mcdonald

Photo from Mcdonald

另外，3月15日起，經典「菠蘿批」亦載譽回歸，脆卜卜外層，包住粒粒菠蘿，係小編細個最鍾意食嘅批！

Photo from Mcdonald

由2月27日起，顧客只要到麥當勞惠顧滿足夠金額，就有機會換購限量版「出前一丁和味陶瓷套裝」一套（包括「清仔大盛碗」一個、「清仔一番碟」一隻以及麥當勞HK$10美食券兩張）。

Photo from Mcdonald

Photo from Mcdonald

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）