【2019/2020財政報告】3個引起網民熱議嘅措施 批評措施多此一舉成效不大！

今日係新一份財政預算案出爐日子，唔少市民都期待今年會唔會繼續派糖措施！財政司司長陳茂波喺大會中提出多項「利民紓困」措施，同時表示非常重視創科發展！

Photo from 政府新聞署

陳茂波提到，政府依家係積極籌備利用「轉數快」畀市民交稅、差餉同水費，預計今年底實施！而政府其他部門如：運輸署、入境事務處和康樂及文化事務署（康文署）研究喺繳費櫃台接受用「轉數快」畀錢。

Photo from shutterstock

Photo from 康文署

「轉數快」係喺上年9月推出，市民可以通過手機喺唔同銀行以及電子錢包間「過數」。金管局早前表示，截至舊年年底，「轉數快」錄得超過1,000億元嘅交易額，日均交易額達11億元。

Photo from 轉數快

另外，金管局會喺短期內發出虛擬銀行牌照，為市民帶嚟新嘅銀行服務體驗。

不過有唔少網民認為政府提倡用「轉數快」交稅係多此一舉，指出PPS都做到同樣嘅交費功能！「PPS都做到啦！」而且，佢哋又批評政府「攞錢就快，派錢就慢」，質疑政府點解一開始唔用「轉數快」派$4000，又唔設立網上交表，浪費好多時間、程序，同埋大量嘅行政費用，仲要唔環保添～

唔止用「轉數快」交稅，陳茂波表示會努力覓車位、錶位設電動車充電器，此舉惹起唔少有車人士不滿！佢哋認為本身都唔夠車位，但仲要撥車位出嚟畀電動車「叉電」，簡直係反其道而行～有網民揶揄：「依家仲有幾多個政府車位，賣得嘅賣、拆得嘅拆～」，變相措施作用唔大！

最後，就係政府撥款6億翻新全港240個公廁，平均$250萬一個公廁（等於好多罐午餐肉），旨在改善衛生問題。但有網民指出，「翻新完，啲人都係唔識痾都係冇用！」，認為此舉無補於事～

大家又點睇今次呢份財政報告呢？

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）